एमालेको राजनीतिक-सांगठनिक प्रतिवेदन आजै पारित गरिने

काठमाडौँ । नेकपा एमालेका अध्यक्ष केपी शर्मा ओलीले आज आइतबार राजनीतिक प्रतिवेदनमाथि केन्द्रीय सदस्यहरूले उठाएका प्रश्नको जवाफ दिँदै छन् ।

पार्टीको जारी केन्द्रीय समितिको बैठकमा अध्यक्ष शर्मा ओली, महासचिव ईश्वर पोखरेल र उपमहासचिव विष्णु पौडेलले प्रतिवेदनमाथि उठेका प्रश्नहरुको जवाफ दिने कार्यतालिका रहेको छ । त्यसपछि बैठकले प्रतिवेदन पारित गर्ने बताइएको छ ।

केन्द्रीय समितिबाट राजनीतिक प्रतिवेदन, संगठनात्मक प्रस्ताव र विधान संशोधन प्रस्ताव पारित भएपछि आगामी साता आयोजना हुने विधान महाधिवेशनमा प्रस्तुत गरिनेछ । त्यसअघि प्रस्तावहरुमाथि छलफल गर्नकै लागि गएको शुक्रबारबाट केन्द्रीय समिति बैठक सुरु भएको थियो ।

आजको बैठकमा राजनीतिक प्रतिवेदनमा अध्यक्ष ओली, सांगठनिक प्रतिवेदनमा महासचिव पोखरेल र विधान मस्यौदा प्रस्तावमा उपमहासचिव पौडेलले सुझाव तथा प्रश्नहरुको आधारमा जवाफ दिनेछन् ।