भरतपुर अस्पतालमा बढाइयो बिरामी जाँचको समय

सफल खबर संवाददाता

सोमबार, २८ भदौ २०७८, १० : ५८
भरतपुर अस्पतालमा बढाइयो बिरामी जाँचको समय

चितवन । असोज १ गतेबाट भरतपुर केन्द्रीय अस्पतालमा बिरामी जाँचको समय बढाइएको छ । अब अस्पतालमा ओपिडी सेवा असोज १ गतेदेखि बिहान ९ बजेबाटै सञ्चालन गर्ने निर्णय गरिएको अस्पतालका मेडिकल मेसु प्राडा कृष्ण पौडेलले जानकारी दिए ।

CG Hills

यसअघि बिहान १० बजेदेखि ३ बजेसम्म सञ्चालन हुँदै आएको ओपीडी सेवालाई विस्तार गरी एक घण्टा अघिबाट नै सञ्चालन गर्न लागिएको हो । ओपीडी टिकट काट्ने समय समेत बढाइएको छ । बिरामीको चाप र टाढादेखि सेवा लिन आउने सेवाग्राहीहरूलाई समेत मध्यनजर गरी एक घण्टा समय थप गरिएको छ । यसअघि बिहान ८ देखि ११ बजेसम्म सञ्चालन हुँदै आएको ओपीडी टिकट काट्ने समय अब मध्याह्न १२ बजेसम्म पुर्‍याइएको मेसु पौडेलले जनाए ।

अस्पतालको अहिलेको प्रमुख समस्या बिरामीको भीड व्यवस्थापन समेत रहेको अस्पताल विकास समितिका अध्यक्ष डा भोजराज अधिकारीले बताए । नेपालको मध्यभागमा अवस्थित यस भरतपुर केन्द्रीय अस्पतालमा चितवनसहित नवलपरासी, गोरखा, धादिङ, मकवानपुर, बारा, तनहुँ, लम्जुङ, रुपन्देही सहितका १९ भन्दा बढी जिल्लाबाट बिरामी उपचारका लागि यहाँ आउने गर्दछन् ।