नेकपा एसमा कोको बन्दैछन् प्रदेश संसदीय दलको नेता ?

काठमाडौं । नेकपा एमालेबाट विभाजित नेकपा एसमा प्रदेशको संसदीय दलको नेता  बन्न नेताहरुको दौडध्रुप सुरु भएको छ ।प्रदेशसभा संसदीय दलले मान्यता पाएसँगै नेकपा एसका ६ वटा प्रदेशमा नेता चयन हुने भएका छन् । गण्डकीमा भने नेकपा एसको एकजना पनि सांसद छैनन् ।

सुदूरपश्चिम प्रदेशसभामा नेकपा एस सबैभन्दा ठूलो दल बनेको छ । १४ सांसदसहित ठूलो दल बनेको हुनाले अन्य प्रदेशमा भन्दा त्यहाँ दलको नेता चयनमा पनि प्रतिस्पर्धा छ । दलको नेताका लागि तारा लामा तामाङ, दीर्घ सोडारी, माया भट्ट र पूर्णा जोशीले दावी गरे पनि सन्तुलनको हिसाबले तामाङलाई दलको नेता बनाउने तयारी नेकपा एसको छ ।

कर्णाली प्रदेशमा नेकपा एसका जम्मा तीनजना सांसद छन् । केन्द्रीय सदस्य समेत रहेकाले चन्द्रवहादुर शाही नेकपा एसको संसदीय दलको नेता बन्ने भएका छन् । लुम्बिनीमा नेकपा एसका एकजनामात्र सांसद रमा घर्ती छन् । त्यसैले त्यहाँ उनी स्वतः दलको नेता हुनेछिन् ।

वागमतीमा नेकपा एसका १३ जना सांसद छन् । ती मध्ये सबैभन्दा सिनियर भएका कारण राजेन्द्र पाण्डे सर्वसम्मत दलको नेता चयन हुने भएका छन् । उनी अष्टलक्ष्मी शाक्यलाई हटाएर मुख्यमन्त्री बन्ने तयारीमा समेत छन् ।

प्रदेश २ मा नेकपा एसका १३जना सांसद छन् । दलको नेता यसअघि पनि सत्रुघन महतो रहेकाले उनले नै निरन्तरता पाउने सम्भावना रहेको छ । प्रदेश २ मा नेकपा एस २ मन्त्रीसहित सरकारमा जाने तयारीमा समेत छ । प्रदेश १ मा नेकपा एसका १० जना सांसद छन् । दलको नेतामा प्रतिस्पर्धा नभएको र सर्वसम्मत रुपमै राजेन्द्र राईलाई चयन गर्ने सम्भावना रहेको केन्द्रीय सदस्य तथा सांसद राजन राईले बताए । उनी दलको नेता हुनासाथ भीम आचार्यविरुद्ध अविश्वास प्रस्ताव ल्याउने तयारीमा छन् ।