बागमती प्रदेशमा मन्त्रिपरिषद् विस्तार हुँदैं, को को छन् मन्त्री हुने चर्चामा

हेटौँडा । बागमती प्रदेशका मुख्यमन्त्री अष्टलक्ष्मी शाक्यले आज मन्त्रिपरिषद् विस्तार गर्ने भएकी छिन् । उनले  मन्त्रिपरिषद् विस्तार गरी ११ सदस्यीय बनाउन लागेकी हुन् । 

नेपाल कम्युनिष्ट पार्टी (एमाले) भएर नेकपा (एकीकृत समाजवादी) नयाँ दर्ता भएसँगै अल्पमतमा परेकी मुख्यमन्त्री शाक्यले यसअघिनै मङ्गलबारसम्मको अवस्था हेरेर मन्त्रिपरिषद् विस्तार गर्नसक्ने बताएकी थिईन् ।

एमाले बागमती प्रदेशका मुख्य सचेतक दीपक निरौलाले मन्त्रिपरिषद्मा पाँच मन्त्री र चार राज्यमन्त्री थप गर्न लागेको जानकारी दिए । उनले बुधबार साँझसम्ममा मन्त्रीहरुको नियुक्तसँगै सपथ ग्रहण गर्ने तय भएको बताउँदै को कसलाई मन्त्रीमा नियुक्त गर्ने पछिमात्र थाहा हुने बताए ।

नयाँ नियुक्त हुने मन्त्रीमा एमालेको ओली पक्षमा नै रहेका र विगतमा माधव नेपाल पक्षमा रहेर एमाले विभाजनपछि एकीकृत समाजवादी सनाखत नगर्ने प्रदेश सभाका सदस्यहरुले मन्त्री र राज्यमन्त्रीमा अवसर पाउने भएका छन् ।

यसअघि मन्त्रिपरिषद् विस्तार नाम चर्चामा आएर अन्तिममा नाम काटिएका प्रदीपकुमार कटुवाल, रचना खड्का, शान्तिप्रसाद पौडेललगायतका नाम विस्तारित मन्त्रिपरिषद्मा पर्ने चर्चामा रहेको छ । भदौ २ गते मुख्यमन्त्रीमा नियुक्त भएसँगै तीन सदस्यीय मन्त्रिपरिषद् गठन गरेकी शाक्यले मन्त्रिमण्डलबाट सामाजिक विकास मन्त्री कृष्णप्रसाद शर्मा खनालले राजीनामा दिएसँगै दुई सदस्यीय मन्त्रिपरिषद् मात्र रहेको छ ।