माधव नेपाललाई २२ सांसदको सुझाव : दोस्रो अध्यक्षको प्रलोभनमा नफस्नू

काठमाडौं । नेकपा एमालेका वरिष्ठ नेता माधवकुमार नेपाललाई केपी ओलीसँग सहमति गरेर दोस्रो अध्यक्षको प्रलोभनमा नफस्न सुझाव दिएका छन् । शेरबहादुर देउवालाई विश्वासको मत दिएका २२ जना सांसदले घुमाउरो पाराले सरकारमा सहभागी हुन माधव नेपाललाई आग्रह गरेका थिए । 

बुधवार नेपालले आफूलाई साथ दिएका सांसदहरूसँग सामूहिक परामर्श गरेका छन् । उनीहरूमध्ये अधिकांसले सरकारमा जान र सरकारलाई सफल पार्नेतिर माधव नेपालको ध्यानाकर्षण गराएका छन् ।

साहना प्रधान स्मृति प्रतिष्ठानको हलमा आयोजना भएको छलफलमा सहभागी सांसदहरुले कार्यदलमा रहेका माधव नेपाल पक्षबाट प्रतिनिधित्व गर्ने नेताहरुले केपी ओलीलाई सहयोग गरेको आरोप लगाएका छन् । सांसदहरूले दोस्रो तहका नेताहरूबाट माधव नेपाललाई धोखा भए पनि तेस्रो र चौथो तहका नेता कार्यकर्ताको साथ रहेको भन्दै खुट्टा नकमाउन आग्रह गरेका छन् ।