नवलपरासीमा यात्रुवाहक बस दुर्घटना हुँदा ४ जनाको घटनास्थलमै मृत्यु, ४ दर्जन बढी घाईते

नवलपरासी । पश्चिम नवलपरासीको दाउन्नेमा यात्रुबाहक बस दुर्घटना हुँदा ४ जनाको मृत्यु भएको छ । सोही बसमा सवार अन्य ४९ जना घाइते भएका छन् । 

पूर्वपश्चिम राजमार्ग अन्तर्गत बर्दघाट नगरपालिका ४ दाउन्ने सडकखण्डको बाँस खोलामा बस खस्दा उक्त दुर्घटना भएको हो । काठमाडौंबाट रुकुम पश्चिमका लागि जाँदै गरेको ना ५ ख २७१३ नम्बरको बस खोलामा खस्दा घटनास्थलमै ४ जनाको मृत्यु भएको नवलपरासी प्रहरीले जनाएको छ । 

मृत्यु हुनेमा रुकुम पश्चिम त्रिवेणी गाउँपालिका वडा बस्ने २७ वर्षीया कल्पना पुन र रुकुम पूर्व सिस्ने गाउँपालिका वडा ४ बस्ने ३६ वर्षीय धनराज घर्ती रहेको नाम खुलेपनि अन्य दुईजना मृतकको सनाखत हुन सकेको छैन् । 

दुर्घटनामा परि घाइते भएकाहरुलाई प्रहरीले उद्दार गरि उपचारका लागि बुटवलका अस्पतालहरुमा पठाएको र अरु घाइतेहरुको बर्दघाटस्थित चिसापानी सामुदायिक अस्पतालमा उपचार भैरहेको प्रहरीले जनाएको छ ।