बाँके र जुम्लामा भीषण आगलागी, बाँकेमा १२० र जुम्लामा ३५ घर खरानी

काठमाडौं । बाँके र जुम्लामा भीषण आगलागी आगलागी भएको छ । आगलागीबाट बाँकेमा १२० र जुम्लामा ३५ घर खरानी भएका छन् । बाँकेको नरैनापुरमा आगलागी हुँदा एक सय २० घर जलेर खरानी भएका छन् । आगो निभाउने क्रममा चार जना घाइतेसमेत भएका बाँके प्रहरीले जनाएको छ । 

नरैनापुर गाउँपालिका वडा नं ४ को खोदवा गाउँमा शनिबार लागेको आगो गएराति १ बजे पूर्णरुपमा नियन्त्रणमा ल्याइएको थियो आगलागीबाट करोडौंको क्षति भएको प्रारम्भिक अनुमान गरिएको छ । आगलागीबाट अन्नबाली, काठ, लत्ताकपडा र नगद जलेर नष्ट भएका छन् । आगो निभाउन पाँचवटा दमकल प्रयोग गरिएको थियो ।

यसैगरी जुम्लाको तिला गाउँपालिका–९ ढिपुगाउँको मुल्लीमा आगलागी हुँदा ३५ घर जलेर नष्ट भएका छन् । ७५ घर भएको मुल्लीमा ३५ घर जलेर नष्ट भइसकेको जुम्ला प्रहरीले जनाएको छ । पर्याप्त पानी नभएका कारण आगो निभाउन सकिएको छैन । घरको छाना निकाल्ने र माटो हालेर आगो निभाउने प्रयास भइरहेको छ । अझै पनि आगो पूर्ण नियन्त्रणमा आइसकेके छैन ।