धादिङ । कतिसम्म अपराधी या कपुत बन्न सक्छन् मानिस ? धादिङमा घटेको एक घटनालाई हेर्ने हो भने मानिस यहाँसम्मको अपराधी बन्न सक्छन् भन्दा जोकोहीलाई पत्याउन मुस्किल हुन्छ । जो घाइते भएर छट्पटाइरहेकी छ, उसैलाई उपचार गर्न अस्पताल लानुको साटो जिउँदै खाल्डामा हालेर पुर्न सक्ने एक अपराधीको कुकृत्यमाथि अनुसन्धान गर्दा प्रहरीसमेत चकित बन्यो ।
घटना फागुन २७ गते धादिङको त्रिपुरासुन्दरी गाउँपालिकामा घटेको हो । घटनाका दोषी जेसिबी चालक हुन् । जसले एउटी जिउँदो महिलालाई खाल्डो खनेर पुरेको छ । त्यसमा पनि घाइते महिलालाई । मानवीयताको थोपामात्र हुने हो भने पनि घाइते महिलालाई उपचार गर्न लाग्नुपर्ने हो, तर यहाँ एउटा अपराधी क्रुर्र भएर निस्कन्छ । ती घाइते महिलालाई जिउँदै खाल्डो खनेर पुर्छ ।
फागुन २७ गते दिउँसोको २ बजेको थियो । धादिङ जिल्ला त्रिपुरासुन्दरी गाउँपालिका वडा नम्बर १ मा रहेको खोल्सी भन्ने स्थानमा भित्री सडक बन्नेक्रम जारी थियो । सडक निर्माणकै लागि प्रदेश नम्बर ३–०१–००३ क ६५६४ नम्बरको जेसिबी चलाइरहेका थिए भीमबहादुर बुढाथोकीले । सडक निर्माणको बाटो भएर कतै जाँदै थिइन् स्थानीय महिला ४० वर्षीय सरस्वती कुमाल । जेसिबी हुत्तिएर आयो अचानक महिलालाई ठक्कर दियो । सरस्वती उठ्न खोजिन्, उठ्न सकिनन् । अस्पताल लैजान गुहारिन् । छटपटाउन थालिन् । घटनास्थलमा कोही मानिस थिएनन्, ठक्कर दिएको पनि कसैले देखेनन् ।
डोजरको बकेटले लागेर घाइते भएकी ती महिलालाई खाल्डो खनेर जिउँदै पुर्न थाले जेसिबी चालकले । सल्यान छत्रेश्वरी गाउँपालिका वडा नम्बर ६ रानागाउँका २२ वर्षीय जीवन भन्ने भीमबहादुर बुढाथोकीले सरस्वतीलाई खाल्डो खनेर पुरिरहँदा स्थानीयले देख्न भ्याए । स्थानीयले देखेपछि कराउन थाले । जेसिबी चालक त्यहीबाट फरार भयो । महिलालाई खाल्डोबाट स्थानीयले तत्कालै निकाले । उद्धारकै क्रममा महिलाको प्राणपखेरु उड्यो । स्थानीयको हुलले तत्कालै जेसिबीमाथि आगजनी गरेका थिए ।
यसरी समातिए भीमबहादुर
हत्यापछि धादिङबाट फरार भएका चालक भीमबहादुरलाई सिआईबीले झण्डै ३ सातापछि भारतको हरिद्वारबाट पक्राउ गरेको छ । घटनापछि फरार भएका अभियुक्त बुढाथोकीलाई केन्द्रीय अनुसन्धान ब्यूरो सिआइबीका डिएसपी अनिल घिमिरेको टोलीले भारतबाट पक्राउ गरी नेपाल ल्याएको हो । सिआइबीले शुक्रबार पत्रकार सम्मेलन गरी अभियुक्त पक्राउबारे जानकारी दिएको छ ।
भीमबहादुर धादिङबाट भागेर सुरुमा दाङ पुगेका रहेछन् । उनी त्यहाँ आफन्तसँग केही रकम मागेर नेपालगञ्ज हुँदै भारत पुगेका थिए । काम विशेषले भारत आएका बताएका बुढाथोकी नेपालमा हत्या गरेर भागेको थाहा पाएपछि आफन्तले प्रहरीकोमा आत्मसमर्पण गर्न पनि सुझाए । तर भीम भने आत्मसमर्पण नगरी त्यहाँबाट पनि भागेर भारतको हरिद्वार पुगे ।
हरिद्वारमै बस्ने क्रममा उनी ४ दिनअघि मात्रै नेपालगञ्ज आएका थिए । उनको बारेमा प्रहरीले थाहा पाएपछि पिछा गरेको थियो । मोबाइल लोकेशन र कल डिटेलका आधारमा प्रहरीले पक्राउ गर्न जाँदा उनले होटल छोडिसकेका थिए । त्यसपछि उनलाई पछ्याएको सिआइबीको टोलीले बिहीबार हरिद्वारबाट पक्राउ गरेको हो । डोजर चालक बुढाथोकीको लाइसेन्ससमेत छैन। लाइसेन्स नभएको व्यक्तिले चलाएको डोजरबाट सरस्वतीको मृत्यु भएको कारण उनलाई कर्तव्य ज्यानमै मुद्दा चल्न प्रहरीको भनाइ छ । सवारी चलाउन दिने डोजर मालिकलाई पनि मुद्दा चल्ने प्रहरीले जनाएको छ ।
प्रतिक्रिया दिनुहोस
सफल खबर संवाददाता
शुक्रबार, ०६ चैत्र २०७७, १६ : २८
लेखकबाट थप
सम्बन्धित समाचारहरु
धादिङमा बस र ट्रक ठोक्किँदा २० जनाभन्दा बढी घाइते, तीन गम्भीर
एमाले धादिङ अध्यक्षमा भूमि त्रिपाठी विजयी
धादिङको विकट बस्ती तिप्लिङमा मोटर बाटो पुग्यो, स्थानीय खुसी
गाउँमा स्वास्थ्यचौकी नहुँदा गर्भवतीलाई सास्ती
‘ड्रागन फुड’मा रमाउँदै धादिङका किसान