नरभक्षी भएको आशंकामा बर्दिया निकुञ्जले लियो थप एक बाघ नियन्त्रणमा

बर्दिया । जिल्ला वन कार्यालय अन्तर्गत खाता जैविक मार्गमा बिहीबार दिउँसो भाले पाटे बाघ नियन्त्रणमा लिइएको छ । करिब १४ वर्ष उमेर पुगेको उक्त बाघलाई मधुवन नगरपालिका—३ स्थित खाता जैविक मार्गको गौरी सामूदायिक वनमा बेहोस बनाएर नियन्त्रणमा लिइएको हो ।

राष्ट्रिय प्रकृति संरक्षण कोषको प्राविधिक टोली र बर्दिया निकुञ्जका कर्मचारीको सहयोगमा उक्त बाघलाई नियन्त्रणमा लिएको हो । गत फागुन २६ गत मधुवन नगरपालिका—३ कोठियाघाटकी २७ वर्षीया रेनुका सुनारलाई बाघले मारेपछि यहाँ आठवटा क्यामेरा जडान गरिएको थियो ।

नियन्त्रणमा लिएको बाघ क्यामेरामा चारपटक कैद भएपछि प्राविधिक टोली तीन दिनअघि यहाँ खटिएको थियो । राष्ट्रिय प्रकृति संरक्षण कोषका प्रमुख डाक्टर रविन कडरियाले यस क्षेत्रमा समस्याण्ग्रस्त बाघ क्यामेरामा पहिचान भएकोले यसलाई नियन्त्रणमा लिएको बताए ।

दुई दिनको अन्तरालमा दुई वटा बाघ निकुञ्जले नियन्त्रणमा लिएको हो । बुधबार मात्रै बर्दिया राष्ट्रिय निकुञ्जको मध्यवर्ती क्षेत्रमा पर्ने गेरुवा–४ को गोला सामुदायिक वनबाट एक बाघलाई नियन्त्रणमा लिइएको थियो । समातिएको बाघ भने नरभक्षी भए,नभएको पुष्टि गर्न नसकिने सहायक वन अधिकृत द्रोण शर्माले बताए । समातिएको बाघलाई बाँके निकुञ्जको खोरमा पठाउन लागिएको छ।