मदन भण्डारी फाउन्डेसनका नाममा गुटबन्दी भयो : खनाल

काठमाडौँ । नेपाल कम्युनिष्ट पार्टी (एमाले) का वरिष्ठ नेता झलनाथ खनालले  मदन भण्डारी फाउन्डेसनका नाममा केपी शर्मा ओलीले गुटबन्दी गरेको बताएका छन् ।

नेकपा एमालेको झलनाथ खनाल–माधव कुमार नेपाल पक्षले बुधबार काठमाडौँमा आयोजना गरेको राष्ट्रिय कार्यकर्ता भेलालाई सम्बोधन गर्दै वरिष्ठ नेता खनालले यस्तो बताएका हुन् ।

 ‘यो पार्टीमा ओलीले गुटबन्दी गर्नुभयो । मदन भण्डारी फाउन्डेसनका नाममा गुटबन्दी गर्दै जाँदा वैचारिक र सैद्धान्तिक विषय शुन्य भयो र संगठनात्मक क्षेत्रमा अराजकता हुन थाले’, खनालले भने, ‘ पार्टी एकता पनि ओलीले नै भंग गर्न थाल्नुभयो र समस्या आए । समस्या आउदा पनि मतभेद आउँदा पनि पार्टी बाहिर लगेनौँ ।’

उनले ओलीका ज्यादतीहरू तीन वर्षसम्म कठोर भएर सहनुपरेको पनि बताए । ‘जब हामीले प्रश्न उठाउन थालेपछि उहाँले संसद नै विघटन गर्न पुग्नुभयो । त्यो संविधानका विरुद्ध थियो’, खनालले भने, ओलीको उक्त कदम राजनीतिक र संवैधानिक लडाइँ लड्दै संसद पुनःस्थापनापछि संविधान, लोकतन्त्र र जनताको जनादेश बचाउन र अस्थिरता अन्त्य गर्न सकियो ।’