काँग्रेसले ल्याउँला आजको बैठकबाट थप संर्घषको कार्यक्रम ?

काठमाडौं । आन्दोलन की चुनाव तयारी लगायतका विषयमा मथ्थापच्ची भईरहेको नेपाली काँग्रेसको केन्द्रीय समिति बैठक आज बस्दैछ । प्रधानमन्त्री केपी ओलीले प्रतिनिधीसभा विघटन गर्ने निर्णय असम्वैधानिक भएको बताएपनि अबको विकल्प के भन्नेमा काँग्रेसमा दुई थरी मत छ ।

देउवाले प्रतिनिधीसभा पूर्नस्थापना हुने नहुने विषय अदालतमा रहेको र अब चुनावको तयारीमा जुट्नुपर्ने पक्षमा मत देखाएका छन् भने कोइराला पौडेल र सिटौला पक्षका नेताहरु प्रतिनिधीसभा पूर्नस्थापना गरेर पहिले संविधानलाई ट्रयाकमा ल्याउनुपर्ने पक्षमा छन् ।

त्यसका लागि थप संर्घषका कार्यक्रम बनाउनु पर्ने यो पक्षको मत छ । तर देउवा त्यो मतलाई स्वीकार गरेर अगाडी बढन चाहिरहेका छैनन् । विगतमा प्रतिनिधीसभा पूर्नस्थापनाको मुद्दा लिएर गिरिजाप्रसाद कोइरालाले जस्तो फेरि पनि आन्दोलनको नेतृत्व गर्ने अवसर देउवाले गुमाउदै गएका छन् । उनी यता न उताको पेन्डुलम शैलीमा देखिएका छन् । 

यस्तो बेला काँग्रेस केन्द्रीय समितिको बैठक आज बस्न लागेको हो । पुस २७ गतेका लागि बोलाइएको बैठक माघ ६ मा सरे पनि उक्त दिन पनि काँग्रेसको केन्द्रीय समिति बैठक बस्न सकेन् र आजका लागि बैठक तय गरिएको थियो । बैठक पार्टी मुख्यालय सानेपामा दिउँसो १ बजे पछि बस्नेछ ।

प्रधानमन्त्री केपी शर्मा ओलीले प्रतिनिधि सभा विघटन गरेपछि काँग्रेसले पुस ७ बाट आन्दोलनका रणनीति बनाउन केन्द्रीय समिति शुरु गरेको हो । यस बीचमा काँग्रेसले प्रतिनिधि सभा निर्वाचन क्षेत्र, प्रदेश सभा निर्वाचन क्षेत्र, सम्पूर्ण स्थानीय तह र वडा तहमा सरकारको कदमको विरोध गरिसकेको छ । तर नेकपाको माधव प्रचण्ड समुहले सत्ता सहकार्य देखि सडक संर्घष सम्म सहकार्यका लागि गरेको प्रस्तावमा देउवा सहमत भईसकेका छैनन् ।

काँग्रेसले औपचारिक रुपमा प्रतिनिधि सभा विघटनलाई असंवैधनिक भने पनि यसको पुर्नस्थापना हुनुपर्ने विषयमा जोड दिएको छैन् । सभापति शेरबहादुर देउवा अदालतमा विचाराधीन मुद्दामा काँग्रेसले नबोल्ने परम्परा रहेको बताउँदै आएका छन् भने उनी इतरका नेताहरुले अदालतलाई दबाव दिनुपर्ने र प्रतिनिधि सभा पुनस्थापना हुनैपर्ने अडानमा रहेका छन् । आजको बैठकमा पार्टीभित्र देखा परेको यी दुई धारका बीचमा संर्घष चल्ने देखिएको छ । देउवालाई आन्दोलनका थप कार्यक्रम बनाएर अगाडी जानुपर्नेमा दबाब बढेको छ ।  

त्यसको लागि महामन्त्री शसांक कोइराला निवासमा हिजै पौडेल पक्षको बैठक बसेको थियो । यो पक्षले सभापति देउवालाई दबाब दिने र आन्दोलनका थप कार्यक्रम आजको केन्द्रीय समिति बैठकबाटै घोषणा गरेर जानुपर्नेमा निर्णय गराउने रणनीति अख्तियार गर्ने भएको छ । पार्टीका भातृ संगठनहरुलाई परिचालन गरेर शसक्त प्रकारको आन्दोलनका कार्यक्रम अब अगाडी वढाउनु पर्नेमा उनीहरुको जोड छ ।