पार्टीभित्र देखिएको समस्या प्रधानमन्त्री ओलीका कारण निम्तिएको हो : माधवकुमार नेपाल

काठमाडौं । नेपाल कम्युनिस्ट पार्टी (नेकपा) का वरिष्ठ नेता माधवकुमार नेपालले पार्टीभित्र देखिएको समस्या अध्यक्ष तथा प्रधानमन्त्री केपी शर्मा ओलीका कारण निम्तिएको दावी गरेका छन् । मंगलबार बबरमहलस्थित कार्की ब्याङ्क्वेटमा आयोजित पार्टीको केन्द्रीय समिति बैठकमा पार्टीको आन्तरिक जीवन र विकसित घटनाक्रमका सन्दर्भलाई प्रकाश पार्दै उनले परिवर्तित परिस्थितिमा यो बैठक आयोजना गरिएको बताए ।

उनले पार्टी सचिवालय बैठक बस्नका लागि पनि धेरै पापड बेल्नुपरेको स्मरण गराए । बैठक बोलाउन केपी ओली तयार नभएपछि आफूहरु धुम्बाराहीमा भेला भएको र मौखिकमात्र नभई लिखित रुपमा पनि आफ्ना कुरा राखौं भनेर ओलीलाई भेट्न बालुवाटार गएको उनले स्मरण गराए ।
त्यहाँ आफूहरुलाई प्रधानमन्त्री ओलीले गैरजिम्मेवार जवाफ दिएको पनि उनले सुनाए । बैठकमा पटक पटक कार्यकारी अध्यक्षको कुर्सी हटाइएको पनि उनले जिकिर गरे । 

‘उहाँ (कार्यकारी अध्यक्ष प्रचण्ड) ले पटक पटक अपमानको विष पिउनु भएको छ,’ उनले भने, ‘मैले त केपी ओलीलाई भनेँ पनि– यो त प्रचण्ड भएकाले मात्र सहनु भयो, म भएको भए..।’

पार्टीका अध्यक्षसमेत रहेका प्रधानमन्त्री ओली, अन्य केही साथीहरु यो बैठकमा अनुस्थित रहेको चर्चा गर्दै उनले उनीहरु एउटा गुटको भेलामा लागेको टिप्पणी गरे । पार्टीको ४४१ सदस्यीय केन्द्रीय समितिको झण्डै दुई तिहाई सदस्य यहाँ उपस्थित रहेको दावी गर्दै उनले कसैले गुटको भेला गरेर त्यस्तो भेलाले गर्ने निर्णय मान्य नहुने बताए ।

एक नम्बर अध्यक्ष भएकाले मेरो हस्ताक्षर कार्यकारी, मैले गरेको काम नै निर्णायक भन्ने खालको कुरा पनि सुन्ने गरिएको चर्चा गर्दै नेता नेपालले विधि, विधान र संविधान अनुसार त्यस्ता तर्कको कुनै तुक नरहेको दावी गरे ।

उनले अहिले देखिएको विवाद पदका लागि नभएको दावीसमेत गरे । ‘पदको हानाथाप होइन, कस्तो पार्टी बनाउने भन्ने विवाद हो,’ उनले भने, ‘नियम र अनुशासनमा बस्नुपर्छ भन्ने कुरालाई उहाँले घेराबन्दी भन्न थाल्नुभयो ।’ सरकारका दैनिक काम कारवाहीमा आफूहरुले हस्तक्षेप नगरेको र गर्नु हुँदैन भन्नेमा जानकार रहेको उनले बताए । तर नियुक्तिहरु, पार्टीका नीतिगत कुराहरु लागू गर्ने सवालमा पार्टीको निर्देशनलाई सरकारलाई मान्नुपर्ने उनको भनाइ थियो । उनले भने, ‘स्थायी कमिटी बैठकमा गरिएको निर्णयलाई पालना गर्नुभएन ।’