प्रहरीको कुटपिटबाट ट्याक्टर चालकको मृत्यु भएको भन्दै नवलपरासीको दुम्किबासमा तनाव

सफल खबर संवाददाता

शुक्रबार, २६ मंसिर २०७७, ०७ : ४८
प्रहरीको कुटपिटबाट ट्याक्टर चालकको मृत्यु भएको भन्दै नवलपरासीको दुम्किबासमा तनाव

नवलपरासी । पूर्वी नवलपरासीको दुम्किबासमा एक ट्याक्टर चालकको मृत्यु प्रहरीको कुटपिटबाट भएको भन्दै दुम्किबास तनावग्रस्त भएको छ । मजदुरहरुले बिहीबार राति देखि  पूर्वपश्चिम महेन्द्रराजमार्गको यातायात अवरुद्ध गरेका थिए । प्रहरीले आज बिहान  बल प्रयोग गरेर बाटो खुलाएको हो ।

प्रहरीले कुट्दा ट्याक्टर चालकको मृत्यु भएको भन्दै स्थानीयले प्रहरीविरुद्ध नाराबाजी र प्रर्दशन गरेका हुन् । बिहीबार रातिदेखि स्थानीयले दुम्किबास बजारमा इलाका प्रहरी कार्यालय दुम्किबास अगाडि प्रदर्शन गरेका थिए । प्रदर्शनका कारण झडपसमेत भएको छ । प्रहरीले घटनालाई नियन्त्रणमा लिन केही राउन्ड अश्रुग्यास प्रहार गरेको थियो भने दोहोरो झडपमा दुईजना प्रहरी सामान्य घाइते भएका छन् ।

बिहीबार राति दुम्किबासस्थित विनयी खोलामा अवैद्य रुपमा बालुवा लिन गएका ट्याक्टरहरुलाई नियन्त्रणमा लिने क्रममा दुर्घटना भइ घाइते भएका चालकको उपचारको क्रममा मृत्यु भएको प्रहरीले जनाएको छ । यता स्थानीयले भने प्रहरीले कुटपिट गरेर मारेको आरोप लगाएका छन् ।

पूर्वी नवलपुरका प्रहरी प्रमुख प्रकाश मल्लले विनयी खोलामा बालुवा चोरी रहेका ट्याक्टरहरु नियन्त्रणमा लिने क्रममा भागाभाग हुँदा ट्याक्टर दुर्घटनामा परेको बताए । प्रहरी खोलामा पुगेको जानकारी पाएपछि बत्ती निभाएर ट्याक्टर दौडाउँदा खाडलमा परेको र उछिट्टिएर चालक गम्भीर घाइते भएको मल्लको भनाइ छ ।