कार दुर्घटना हुँदा एक महिलाको मृत्यु

भक्तपुर । भक्तपुरको कौशलटारमा आइतबार मध्यराति भएको कार दुर्घटनामा परी एक जना महिलाको मृत्यु भएको छ। बा. ८ च ४७५६ नं को कार काठमाडौबाट भक्तपुर आउने क्रममा अनियन्त्रित भई लेनमा पल्टिईएर  सडक बीचको फलामको रेलिङहरुलाई ठक्कर दिई दुर्घटना भएको देखिएको महानगरीय प्रहरी परिसर भक्तपुरले जनाएको हो ।  

सो दुर्घटनालगत्तै सडक किनारमा अन्दाजी ३० वर्षकी महिला अचेत अवस्थामा लडेको देखिएपछि उनलाई उपचारका लागि अस्पताल पुर्‍याउँंदा चिकित्सकले मृत घोषणा गरेको प्रहरी परिसर भक्तपुरले जनाएको छ। मृतक महिला काठमाडौ महानगरपालिका ४ धुम्बाराही पिपलबोट बस्ने वर्ष ३० की रिया श्रेष्ठ रहेको खुल्न आएको छ।

घटना सम्बन्धमा बुझ्दा उक्त कारमा सवार मृतक रियासमेत ३ जनालाई लिएर काठमाडौतर्फ जाने क्रममा दुर्घटना भएको भन्ने आइतबार विहान प्रहरीको नियन्त्रणमा आएका चालक रञ्जित कार्कीले प्रारम्भिक सोधपुछको क्रममा बताएको प्रहरीले जनाएको छ। घटनास्थलमा भक्तपुर मध्यपुर ठिमी नगरपालिका १ लोकन्थी बस्ने वर्ष २६ का रञ्जित कार्की र भक्तपुरको सूर्यविनायक नगरपालिका ४ गाम्चा बस्ने वर्ष २७ का सुदप थापाको अवस्था सामान्य रहेको छ।

यस्तै, भक्तपुरको मध्यपुर ठिमी नगरपालिका ५ राधेराधे बस्ने वर्ष २६ का विजय देउजालाई सामान्य चोटपटक लागेको परिसरका सूचना अधिकृत दीपक गिरीले बताए। घटनाबारे थप अनुसन्धान जारी रहेको उनले बताए।