बर्दिबास बालिका हत्या प्रकरण : मृतक सञ्जयलाई सहिद घोषणा गर्न माग, आन्दोलन चर्काउने सर्वपक्षीय बैठकको निर्णय

महोत्तरी । बालिकाको हत्यारालाई कडा कारबाही तथा मृतक सञ्जय न्यौपानेलाई सहिद घोषणा माग गर्दै स्थानीय प्रशासनले गरेको निषेधाज्ञाको बुधबार स्थानीयवासीले बिरोध गर्दै अवज्ञा गरेका छन् ।

अवज्ञा गर्दै बिहानैदेखि स्थानीयले प्रदर्शन जारी राखेका हुन् । महोत्तरीको बर्दिबासका ६ वर्षीया बालिका गुलाबसा खातुनको बलात्कारपछि हत्या भएको आरोपमा प्रहरी नियन्त्रणमा रहेका आरोपित अरुण कुमार साहलाई कडा कारबाही गर्दै स्थानीयले मंगलबारदेखि नै प्रदर्शन गर्दै आएका छन् ।

मंगलबार प्रहरीले चलाएको गोली लागेर प्रदर्शनकारी संजय न्यौपानको काठमाडौं स्थित अस्पतालमा उपचारको क्रमममा मृत्यु भएपछि आन्दोलन झन चर्किएको छ ।

जिल्ला प्रशासन कार्यालय महोत्तरीले निषेधाज्ञा जारी गरेपनी प्रदर्शनकारीले बिहानैदेखि पूर्व–पश्चिम राजमार्ग ठप्प पार्दै प्रदर्शन गर्दै आएका छन् भने दर्जनौ सवारी साधन समेत तोडफोड गरेका छन् । नारावाजी गर्दै प्रदर्शनकारीले राजमार्गमा टायर बालेर बाटो अवरुद्ध गरेका छन् ।
उनीहरूले बालिकाको हत्यारालाई कडा कारबाही गर्नुपर्ने, प्रहरी दमन अन्त्य गर्नुपर्ने, गोली चलाउने प्रहरी र गोली चलाउन आदेश दिनेलाई तुरुन्त निलम्बन गरी कारबाही गर्नुपर्ने लगायतका माग समेत राखेका छन् ।

त्यस्तै उपचारको क्रममा मृत्यु भएका न्यौपानेलाई सहिद घोषणा गरी पीडित परिवारलाई क्षतिपूर्तिसमेत दिन माग स्थानीयस्तरमा आज बसेको सर्वपक्षीय बैठकबाट गरेका छन् ।
बर्दिबास सेवा समितिले आयोजना गरेको सर्वपक्षिय बैठकले मृतक न्यौपानेलाई सहिद घोषणा गर्नुपर्ने, आन्दोलनका घाइतेलाई उपचार तथा क्षतिपुर्ती दिनु पर्ने, आन्दोलनमा गोली चलाउन निर्देशन दिनेलाई तुरुन्त निलम्ब र बर्खास्त गर्नु पर्ने, बालिकाको हत्यारालाई कडा कारवाही हुनु पर्ने सर्वपक्षीय बैठकबाट निर्णय गरिएको छ ।

माग पूरा गराउनका लागि नेपाली कांग्रेसका नेता चिरञ्जिवी हमालको संयोजकत्वामा ११ सदस्यीय बार्ता टोली गठन गरिएको छ । सो वार्ता टोलिले सरकारसँग छलफ गर्ने र माग पूरा गराउनका लागि सडकबाट दवाव सृजना गर्ने जनाइएको छ ।

बर्दिबास नगरपालिका वडा नम्बर १४ स्थित शुभम् बस्तीमा बस्ने सहिद आलमकी ६ वर्षीया छोरी गुलाबसा खातुनको बलात्कार पछि हत्या गरिएको अनुमान छ ।

घटनाको विरोधमा मंगलबार दिउँसो गरिएको प्रदर्शनबाट प्रहरीमाथि ढुङ्गामुडा गर्दा प्रहरीले प्रदर्शनकारीको भिडलाई नियन्त्रण लिन गोलि चलाएको थियो ।  गोली लागेर ३ जना घाइते भएका थिए भने सोमध्ये बर्दिबास नगरपालिका वडा नम्बर १ बस्ने सञ्जय भनिने बुद्धिराज न्यौपानेको उपचारका क्रममा ग्राण्डि होस्पिटलमा मंगलबार राति मृत्यु भएको थियो ।