काँग्रेस नेताहरुको आज सामुहिक कोरोना परिक्षण

 काठमाडौं । प्रमुख प्रतिपक्ष दल काँग्रेसका केन्द्रीय नेताहरुको सामुहिक रुपमा कोरोना परिक्षण गरिदैंछ । पार्टी केन्द्रीय कार्यालयमा आज बिहिबार बिहान १० बजेदेखि १ बजेसम्म केन्द्रीय सदस्यहरुको कोरोना परिक्षण गर्न लागेको काँग्रेस केन्द्रीय कार्यालयले जनाएको छ । 

काँग्रेस केन्द्रीय समिति बैठक भोलिलाई बोलाईएको छ । पार्टीको आसन्न फागुनमा तय भएको महाधिवेशन कार्यकतालिका संसोधन गर्ने र संसदको बैठक बोलाउन दबाब दिने निर्णयका लागि काँग्रेस केन्द्रीय समिति बैठक भोलिबाट बस्दैछ । 

बैठकमा सहभागी हुने नेताहरुले कोरोना परिक्षण अनिवार्य गर्नुपर्ने नीति बनाएपछि काँग्रेस नेताहरुले पार्टी कार्यालयमा सामुहिक परिक्षण गराउन लागेका हुन् । पार्टी पदाधिकारी सहित केन्द्रीय सदस्य र उनका सहयोगीहरूलाई पिसिआर परिक्षण अनिर्वाय गराएर मात्र बैठकमा सहभागि हुन काँग्रेसले आग्रह गरेको छ ।