आईपीएल :  हारको नजिक पुगेको कोलकाताले पन्जाबलाई २ रनले हरायो

एजेन्सी । इन्डियन प्रिमियर लिग (आईपीएल) क्रिकेटमा  कोलकाता नाइटराइडर्सले   किंग्स इलाभेन पन्जाबमाथि नाटकीय जित निकालेको छ । लगभग हारको नजिक पुगिसकेको कोलकाताले किंग्स इलाभेन पन्जाबलाई अन्ततः २ रनले हराएको हो ।

जितका लागि १ सय ६५ रन पछ्याइरहेको पन्जाबले २० ओभरमा पाँच विकेट गुमाएर १ सय ६२ रन बनायो । खेल टाइ गराउन पन्जाबलाई अन्तिम बलमा ६ रन चाहिएको थियो । तर त्यसमा ग्लेन म्याक्सवेलले चार रन मात्र बटुल्न सके । हारले पन्जाब एकै जितमा सीमित रह्यो र अन्तिम स्थानमा रह्यो । 

व्यक्तिगत लयमा रहेका कप्तान केएल राहुलले सर्वाधिक ७४ रन बनाए । उनले ५८ बलको सामना गरेर ६ चौका प्रहार गरे । उनले ५६ रन बनाएका मयंक अग्रवालसँग पहिलो विकेटका लागि १ सय १५ रनको साझेदारी गरे ।

यसअघि टस जितेर पहिले ब्याटिङ गरेको कोलकाताले कप्तान दिनेश कार्तिकको ५८ रनको योगदानमा ६ विकेट गुमाउँदै १ सय ६४ रन बनाएको थियो । दिनेशले २९ बल मात्र सामना गरे र ८ चौका तथा दुई छक्का प्रहार गरे ।