खेतमा गैँडा धपाउन बिछ्याइएको करेन्ट लागेर महतोको मृत्यु

चितवन । माडीमा वन्यजन्तु धपाउन बिछ्याइएको करेन्ट लागेर आज एक जनाको मृत्यु भएको छ । मृत्यु हुनेमा माडी नगरपालिका  ६ वसन्तपुरका ६० वर्षीय सुकदेव महतो रहेको जिल्ला प्रहरी कार्यालय चितवनका प्रहरी निरीक्षक देवराज शर्माले जानकारी दिए ।

प्रहरी निरीक्षक शर्माका अनुसार महतोलाई वसन्तपुरस्थित खेतमा गैँडा धपाउन बिछ्याइएको बिजुलीको नाङ्गो तारको करेन्ट लागेको थियो । हिँडिरहेका अवस्थामा करेन्ट लागेर घाइते भएका उनको बघौडा अस्पताल माडीमा उपचारका क्रममा मृत्यु भएको हो ।  

घटनाको थप अनुसन्धान भइरहेको छ । शव परीक्षणका लागि भरतपुर अस्पतालमा राखिएको छ ।