भारत र चीन बिचको तनावलाई लिएर अमेरिकाले दियो यस्तो प्रतिक्रिया

एजेन्सी । भारत र चीनका सेनाबीच सिमावर्ती क्षेत्र गलवानमा भएको भिडन्तबारे अमेरिकाले प्रतिक्रिया दिएको छ । अमेरिकाका विदेशमन्त्री माइक पोम्पियोले ट्वीट गर्दै भारतीय सैनिकको निधनप्रति समवेदना व्यक्त गरेका छन् ।

माइक पोम्पियोले भनेका छन्, ‘हामी चीनसँग हालै भएको संघर्षका कारण भएको निधनमा भारतका बासिन्दाहरुप्रति गहिरो समवेदना व्यक्त गर्दछौँ । शोकाकुल मृतक सैनिकका परिवार, आफन्त र प्रियजनलाई स्मरण गर्दछौँ ।’ भारत र चीनका बीच तनाव जारी रहेका बेला अमेरिका चीनसँग आफ्नो सम्बन्ध सुधारको प्रयासमा पनि जुटेको छ । बुधबार अमेरिकी विदेशमन्त्री पोम्पियोले चीनका शीर्ष नेता यांग जिचीसँग सात घण्टा बैठक गरेका छन् ।

चीन र भारतका सैनिकबीच गलवानमा भिडन्त हुँदा २० जना भारतीय सैनिकको मृत्यु भएको थियो । चीनले आफ्नो तर्फको क्षतिबारे केही पनि खुलाएको छैन् ।