भारतमा आगलागीमा परी सातको मृत्यु

काठमाडौं । पसलसहितको एक आवसीय भवनमा आगलागी हुँदा भारतको मध्य प्रदेशमा कम्तीमा सात जनाको मृत्यु भएको अधिकारीहरूले जनाएका छन् । मध्यप्रदेशको राजधानी भोपालबाट करिब ४०४ किलोमिटर टाढा ग्वालियर शहरको इन्दरगञ्जमा आगलागी भएको र घटनामा पाँच अन्य घाइते भएका बताइएको छ ।

“सोमबार ग्वालियर शहरमा आगलागी हुँदा सात व्यक्तिको मृत्यु भएको र पाँच अन्य आगोले जलेर सख्त घाइते भएका छन्,” स्थानीय एक प्रहरीले घटनालाई पुष्टि गर्दै भने । प्रहरीका अनुसार घटनामा मृत्यु हुनेमा चार बालबालिकासहित तीन महिला रहेका छन् ।

स्थानीय वासिन्दाका अनुसार एउटा रङ पसलबाट आगलागी शुरू भएको थियो,जुन क्षणभरमा नै भवनको माथिल्लो तलासम्म फैलिएको थियो ।

स्थानीय वासिन्दा अतुल चौधरीले भन्नुभयो, “रङ पसलबाट शुरू भएको आगलागी सोही भवनमा रहेका दुई परिवार बस्दै आएको माथिल्ला तलामा तुरून्तै फैलिएपछि त्यहाँ रहेका महिला तथा बालबालिकाको निधन भएको हो ।” प्रहरी र स्थानीयको लामो प्रयासपछि केही घन्टापछि भवनमा लागेको आगो नियन्त्रणमा आइसकेको छ ।