बेलायतमा लकडाउन खुकुलो पार्न शर्तसहितको योजना

एजेन्सी । लकडाउन खुकुलो बनाउने सम्बन्धी शर्तसहितको योजना  बेलायती प्रधानमन्त्री बोरिस जोन्सनले सार्वजनिक गरेका छन् । लामो समय देखि कोरोना भाइरसको महामारीका कारण बेलायत लकडाउनमा भएसंगै खुलाउन केही खुकुलो पार्न थालिएको हो । 

इंग्ल्याण्डका बासिन्दाहरु आउँदो बुधबारदेखि घरबाहिर निस्कन पाउने भएका छन् । घरबाट काम गर्न नसक्ने वा नमिल्ने व्यक्तिहरु कार्यालय जान सक्ने तर सार्वजनिक यातायातको भने प्रयोग गर्न नपाइने प्रधानमन्त्री जोन्सनले बताएका छन् । पाँच चरणसहितको कोभिड अलर्ट सम्बन्धी नयाँ सिस्टम ल्याइएको र त्यसका आधारमा लकडाउनलाई कत्तिको खुकुलो पार्ने भन्ने तय हुने उनले उल्लेख गरेका छन् ।

अर्को चरण जुन १ देखि सुरु हुने अपेक्षा गरिएको र त्यसपछि प्राथमिक तहका इंग्ल्याण्डका विद्यार्थीहरु स्कूल जान पाउने छन् । राष्ट्रका नाममा गरेको सम्बोधनको क्रममा प्रधानमन्त्री जोन्सनले सो चरणमा पसलहरु पनि खुला हुन सक्ने बताए । तर त्यसका लागि वैज्ञानिकहरुको अनुमति भने चाहिने उनले उल्लेख गरेका छन् । त्यसपछिको चरण जुलाई १ मा सुरु हुनेछ, जसमा होटल तथा रेस्टुरेन्टहरु पनि खुला हुन पाउने छन् ।

लकडाउन अन्त्य नभएको स्पष्ट पार्दै प्रधानमन्त्री जोन्सनले बिस्तारै सहज हुने क्षेत्रहरु खुला गर्न थालिने बताएका छन् । अब घर बाहिर निस्कन पाइने, सार्वजनिक स्थानमा जान पाइने तथा सार्वजनिक स्थानमा सीमा बिना व्यायाम गर्न पाइने भए पनि सामाजिक दूरी भने कम्तिमा दुई मिटरको कायम गर्नु पर्ने र सम्भव भएसम्म घरमै बस्न आग्रह गरिएको छ ।

बेलायत कोरोना भाइरसबाट सबैभन्दा प्रभावित हुने देशको सूचिमा अमेरिकापछि दोस्रो नम्बरमा छ । अहिलेसम्म बेलायतमा कोभिड–१९ बाट ३१ हजार ९ सय ३० जनाको ज्यान गएको छ । संक्रमितको संख्या २ लाख २० हजार भन्दा बढी रहेको छ ।