काँग्रेसका ७७ वटै जिल्ला सभापतिले भने : ‘उपप्रधानमन्त्री इश्वर पोख्रेल र स्वास्थ्य मन्त्री भानुभक्त ढकाललाई बर्खास्त गर’

काठमाडौं । काँग्रेसका सभापति शेरबहादुर देउवा र वरिष्ठ नेता रामचन्द्र पौडेलले कोरोना रोकथाम र नियन्त्रणका लागि सरकारले खरिद गर्न लागेको औषधी तथा उपकरण खरिद प्रकरणको निस्पक्ष छानविनको माग गरिरहेका बेला काँग्रेसका जिल्ला सभापतिहरु पनि सामुहिक रुपमा बोलेका छन् ।

शनिबार साँझ ७७ वटै जिल्ला सभापतिहरुले संयुक्त वक्तब्य निकाल्दै स्वास्थ्य उपकरण खरीदमा भएको भ्रष्टाचारमा संलग्नलाई कारवाहीको माग गरेको हो । उनीहरुले कोरोना रोकथाम उच्चस्तरीय समितिका पदाधिकारीदेखि स्वास्थ्यमन्त्री भानुभक्त ढकाललाई तत्काल बर्खास्त गर्न भनेको छ ।

’स्वास्थ्य उपकरण खरीद प्रकरणमा संलग्न उच्चस्तरिय समिति, स्वास्थ्य मन्त्री र थप संलग्नहरुलाई तत्काल वर्खास्त गरी भ्रष्टाचारको विषयमा छानविन गरियोस,’ काँग्रेसका जिल्ला सभापतिहरुको विज्ञप्तिमा भनिएको छ । सरकारले बनाएको कोविड १९ रोकथाम र नियन्त्रण उच्चस्तरीय समितिका संयोजक उपप्रधान तथा रक्षामन्त्री ईश्वर पोखरेल हुन् ।

उनकै निर्देशन र संग्लनतामा ओम्नी गुप्रले औषधी खरिदको जिम्मा पाएको थियो । तर अहिले चौतर्फी विरोधपछि सरकारले ओम्नीसँगको सम्झौता रद्द गरिसकेको छ । समितिकै संलग्नतामा चीनबाट खरीद गरी ल्याएका स्वास्थ्य सामग्रीमा भ्रष्टाचार भएको जिल्ला काँग्रेसका ७७ ओटै जिल्ला सभापतिहरुले जिकिर गरेका छन् ।

कोरोनाको विपदमा सरकारले घोषणा गरेको लकडाउनको भने सभापतिहरुले स्वागत गरेका छन् । यस्तो अवस्थामा सरकारका मन्त्रीहरु भ्रष्टाचारमा लाग्नु खेदजनक विषय भएको सभापतिहरुको भनाई छ । ‘सरकारका मन्त्रीहरु र आसेपासेहरुले अधिकारको दुरुपयोग गरी करोडौंको भ्रष्टाचार गरी जनताको जीउधनसँग खेलवाड गर्ने प्रपन्चमा लाग्नु खेदजनक विषय हो,’ विज्ञप्तिमा भनिएको छ ।