चितवन । प्रहरीको नियन्त्रणमा रहेका सैनिक जवानको मृत्यु भएपछि त्यसको विरोधमा फिस्लिङमा स्थानीयवासीले अवरुद्ध गरेको पृथ्वी राजमार्ग तीन घण्टापछि खुलेको छ । इच्छाकामना गाँउपालिका ५ मुग्लिन घर भएका सैनिक जवान २८ वर्षीय राम कँडेलको प्रहरी नियन्त्रणमै मृत्यु भएपछि स्थानीयले मध्याह्न १२ बजेदेखि राजमार्ग अवरुद्ध पारेका थिए ।
स्थानीय, आफन्त र प्रहरीबीच घटनाको अनुसन्धान गरी सत्यतथ्य बाहिर ल्याउने सहमति भएपछि राजमार्ग खुलेको जिल्ला प्रहरी कार्यालय चितवनले जनाएको छ । अहिले राजमार्ग खुलेसँगै जाममा रहेका सवारीसाधन गन्तव्यतर्फ लागेको र अवस्था सामान्य बन्दै गएको प्रहरी नायब उपरीक्षक एकनारायण कोइरालाले बताए ।
नेपाली सेनाको बर्दबहादुर गण सिन्धुलीमा कार्यरत कँडेललाई शनिबार इच्छाकामना मन्दिरमा लागेको मेलामा होहल्ला गरेको भन्दै फिस्लिङ प्रहरीले पक्राउ गरेको थियो । मदिरा पिएपछि होहल्ला गरिरहेका कँडेललाई सम्झाउन खोज्दा प्रहरीमाथि नै हातपात गर्न थालेपछि नियन्त्रणमा लिइएको प्रहरीले जनाएको छ ।
प्रहरीका अनुसार कँडेल चौकीबाट भाग्न खोज्दा अस्थायी प्रहरी पोष्ट फिस्लिङको भवनको दुई तला माथिबाट खसेका थिए । घाइते भएको अवस्थामा फेला परेका उनलाई भरतपुरतर्फ उपचारका लागि लैजाँदै गर्दा बाटैमा मृत्यु भएको प्रहरी नायव उपरीक्षक कोइरालाले बताए । शव अहिले भरतपुर अस्पतालको शवगृहमा राखिएको छ ।
सामान्य विवादपछि प्रहरी नियन्त्रणमा पुगेका कँडेलको रहस्यमय ढंगबाट मृत्यु भएको स्थानीयवासीको आरोप छ ।
प्रतिक्रिया दिनुहोस
सम्बन्धित समाचारहरु
दुई बालकको मृत्युपछि अवरुद्ध भएको पृथ्वी राजमार्ग खुल्यो
पृथ्वी राजमार्गको अवरोध हट्यो
काठमाडौंबाट पोखरा जाँदै गरेको बस त्रिशुली नदीमा खस्यो
पृथ्वी राजमार्गमा यात्रा सकसपूर्ण
अवरुद्ध पृथ्वी राजमार्ग एकतर्फी सञ्चालनमा
पृथ्वी राजमार्ग पूर्णरुपमा अवरुद्ध