ग्लोबल आइएमई बैंकका कर्मचारी पिताम्बर खड्का मृत फेला

काठमाडौँ । ग्लोबल आइएमई बैंकमा कार्यरत पिताम्बर खड्का झापाको दमकस्थित आफ्नै निवासमा मृत अवस्थामा फेला परेका छन् । इलाका प्रहरी कार्यालय दमकका अनुसार उनी घरको भुइँतल्लाको कोठामा झुण्डिएको अवस्थामा भेटिएका थिए ।

प्रहरीले प्रारम्भिक रूपमा घटनालाई आत्महत्यासँग जोडेर अनुसन्धान अघि बढाएको छ । पोस्टमार्टम प्रक्रिया सम्पन्न भइसकेको तथा घटनासम्बन्धी थप अनुसन्धान जारी रहेको जनाइएको छ ।

मृतकका बुवा महेश खड्काले छोरालाई झुण्डिएको अवस्थामा देखेपछि प्रहरीलाई जानकारी गराएका थिए । त्यसपछि प्रहरी निरीक्षक नवीन राईको नेतृत्वमा पुगेको टोलीले घटनास्थलको मुचुल्का तयार गरी शव पोस्टमार्टमका लागि पठाएको थियो ।