ग्लोबल आइएमई बैंकको १९औँ वार्षिकोत्सवमा सामाजिक उत्तरदायित्वका १९ कार्यक्रम घोषणा

काठमाडौँ । ग्लोबल आइएमई बैंक लिमिटेडले आफ्नो १९औँ वार्षिकोत्सवको अवसर पारेर संस्थागत सामाजिक उत्तरदायित्व (सीएसआर) अन्तर्गत १९ वटा प्रभावकारी कार्यक्रम सञ्चालन गर्ने घोषणा गरेको छ।

नेपालको अग्रणी वाणिज्य बैंकका रूपमा स्थापित बैंकले विगत वर्षजस्तै यसपटक पनि सामाजिक क्षेत्रमा ठूलो योगदान दिने उद्देश्य राखेको छ। गत वर्ष बैंकले १८औँ वार्षिकोत्सवमा मानविय सहयोग, शिक्षा, स्वास्थ्य, वातावरण संरक्षण र वित्तीय साक्षरता लगायतका कार्यक्रम आयोजना गर्दै मुलुकभर १८ हजार विरुवा रोपेको थियो।

यस वर्ष बैंकले शिक्षा, स्वास्थ्य, वातावरण संरक्षण, वित्तीय साक्षरता तथा आयआर्जन अभिवृद्धि कार्यक्रमलाई प्राथमिकतामा राख्दै दुर्गम क्षेत्र, गरिब, विपन्न र न्यून आय भएका समुदायलाई लक्षित गर्दै देशव्यापी रूपमा कार्यक्रम सञ्चालन गर्नेछ।

महिला स्वास्थ्य र आँखा जाँचमा विशेष पहल

‘ग्लोबल आइएमई स्वस्थ नारी’ पहल अन्तर्गत सातवटै प्रदेशमा १४ वटा निःशुल्क महिला स्वास्थ्य शिविर सञ्चालन गरिनेछ। शिविरमा स्त्रीरोग विशेषज्ञहरूले स्वास्थ्य जाँच, पाठेघरको क्यान्सर परीक्षण (भीआईए), गर्भाशय प्रोल्याप्स उपचार र औषधि वितरण गर्नेछन्। प्रारम्भिक अवस्थामा पत्ता लागेका र गम्भीर बिरामी महिलाहरूको शल्यक्रिया उपचार दोस्रो चरणमा पनि गरिनेछ। विगत पाँच वर्षदेखि सञ्चालन भइरहेको यस कार्यक्रमबाट १० हजारभन्दा बढी महिलाहरू लाभान्वित भइसकेका छन्।