इरानमा नियन्त्रणमा परेका नेपाली नागरिक अमृत झाको उद्धार प्रक्रिया जारी रहेको परराष्ट्रको प्रस्टोक्ति

काठमाडौँ । इरानमा नियन्त्रणमा रहेका नेपाली नागरिक अमृत झालाई स्वदेश फर्काउने काम अघि बढिरहेको परराष्ट्र मन्त्रालयले जनाएको छ । 

मन्त्रालयले नियमित जानकारी अद्यावधिक गर्दै उनको फिर्तीका लागि आवश्यक कूटनीतिक तथा कानुनी प्रक्रिया निरन्तर अघि बढाइरहेको स्पष्ट पारेको हो ।

मन्त्रालयका प्रवक्ता लोकबहादुर पौडेलका अनुसार झा हाल इरानी पक्षको नियन्त्रणमै रहेका छन् भने उनको रिहाइसँग सम्बन्धित औपचारिक प्रक्रिया अझै पूरा हुन बाँकी छ ।

इरानको हालको संवेदनशील परिस्थितिले आवश्यक कानुनी प्रक्रिया अगाडि बढाउन केही ढिलाइ भएको मन्त्रालयको भनाइ छ ।

प्रवक्ताले सम्बन्धित निकायसँग समन्वय गर्दै झाको अवस्था र उद्धार प्रयासबारे नियमित सम्पर्कमा रहेको तथा परिवारलाई पनि आवश्यक जानकारी दिइरहेको बताए । रिहाइका लागि कूटनीतिक पहल निरन्तर जारी रहेको उनले उल्लेख गरे ।