ट्रान्जिटमा रहेका सबै नेपाली गन्तव्यतर्फ पठाइएको परराष्ट्र मन्त्रालयको दाबी

काठमाडौँ । परराष्ट्र मन्त्रालयले पश्चिम एसियामा देखिएको द्वन्द्वका कारण ट्रान्जिटमा रोकिएका नेपाली नागरिकहरूको व्यवस्थापन सम्पन्न भइसकेको जनाएको छ।

शुक्रबार मन्त्रालयमा आयोजित पत्रकार सम्मेलनमा प्रवक्ता लोकबहादुर पौडेल क्षेत्रीले सम्बन्धित दूतावासहरूको समन्वयमा ट्रान्जिटमा रहेका सबै नेपालीलाई आ-आफ्नो गन्तव्यतर्फ पठाइसकिएको जानकारी दिए। उनका अनुसार हालको अवस्थामा ट्रान्जिटमा कुनै पनि नेपाली समस्यामा रहेको विवरण प्राप्त भएको छैन।

मन्त्रालयका अनुसार जेद्दामा समस्यामा परेका ५२ जना हजयात्रीको समेत व्यवस्थापन गरी स्वदेश फर्काइएको छ।

द्वन्द्वका कारण नेपाली नागरिकमा पर्न सक्ने सम्भावित प्रभावलाई ध्यानमा राख्दै दूतावासमार्फत सम्बन्धित देशका निकायसँग निरन्तर समन्वय र सूचना संकलन भइरहेको प्रवक्ता पौडेलले बताए।