अर्थमन्त्रीको दाबी : आर्थिक सुधारका कार्यक्रम कार्यान्वयन चरणमा, निजी क्षेत्रको सुझाव बजेटमा समेटिने

काठमाडौँ । अर्थमन्त्री डा. स्वर्णिम वाग्लेले सरकार आर्थिक सुधारका कार्यक्रम कार्यान्वयन चरणमा प्रवेश गरिसकेको बताएका छन् । नेपाल चेम्बर अफ कमर्सका प्रतिनिधिसँगको भेटमा उनले सुधारमुखी नीतिगत कदमहरू अघि बढाइएको स्पष्ट पारेका हुन् ।

उनका अनुसार राजस्व अनुसन्धान विभाग खारेज भइसकेको र कर संरचना घटाउने दिशामा समेत तयारी भइरहेको छ । अर्थतन्त्रलाई सुदृढ बनाउन राजस्व वृद्धि, रोजगारी सिर्जना र समग्र आर्थिक आकार विस्तारलाई प्राथमिक लक्ष्य बनाइएको उनले बताए ।

मन्त्री वाग्लेले सरकारले उदार आर्थिक नीति अवलम्बन गर्दै निजी क्षेत्रलाई सहज वातावरण उपलब्ध गराउने दिशामा काम भइरहेको उल्लेख गरे । आगामी बजेट व्यवसायी तथा आम नागरिक दुवैलाई उत्साहित गर्ने खालको हुने र निजी क्षेत्रका रचनात्मक सुझावलाई समेटिने प्रतिबद्धता पनि उनले व्यक्त गरे ।

सो अवसरमा नेपाल चेम्बर अफ कमर्सले आगामी आर्थिक वर्ष २०८३/८४ को बजेटका लागि विस्तृत सुझाव पेस गरेको छ । अध्यक्ष कमलेशकुमार अग्रवाल नेतृत्वको टोलीले अर्थतन्त्रलाई गतिशील बनाउने उद्देश्यसहित सुझाव प्रस्तुत गरेको

हो ।