गृहमन्त्रीको निर्देशन : चार दिनमा २२६ जना बिचौलिया पक्राउ

काठमाडौँ । गृहमन्त्री सुधन गुरुङको सक्रियतासँगै प्रहरीले चार दिनमा २२६ जना बिचौलिया पक्राउ गरेको छ ।

काठमाडौँ उपत्यकासहित विभिन्न जिल्लाबाट प्रहरीले चैत १८ गते ६९, १९ गते ७१, २० गते २४ र २१ गते ६२ जना पक्राउ गरेको हो ।

सार्वजनिक तथा सरकारी कार्यालय आसपासमा अनुमति नलिइकन अवैध ढंगले बिचौलीकाको काम गर्न कार्यालय नै स्थापना गरेका र डुलुवाका रुपमा बिचौलिया बनेकामाथि निगरानी बढाउँदै प्रहरीले नियन्त्रणमा लिएको हो ।

प्रहरीले उपत्यकाबाट चैत १८ गते ५१ जनालाई पक्राउ गरेर एक्सन सुरु गरेको हो । काठमाडौँका विभिन्न बस काउन्टरसँगै ललितपुर र भक्तपुरबाट पक्राउ गरेको हो ।कोशी प्रदेशबाट चैत १८ गते १८ जना नै पक्राउ परेका छन् । सुनसरी मालपोतबाट १३ र यातायातबाट पाँच जनालाई नियन्त्रणमा लिएको हो ।

चैत १९ गते झापा यातायातबाट एक र मधेश प्रदेशको पर्सा यातायातबाट तीन र सप्तरी मालपोतबाट चार गरेर सात जना पक्राउ गरेको हो । बागमतीको चितवन मालपोतबाट २३ जनालाई पक्राउ गरेको प्रहरीले गण्डकी प्रदेश कास्कीबाट दुई र कर्णालीको सुर्खेत मालपोतबाट १९ जनालाई नियन्त्रणमा लिएको छ ।

त्यसैगरी सुदूरपश्चिम प्रदेशको कैलाली, कञ्चनपुर मालपोत र जिल्ला प्रशासनबाट १९ जना पक्राउ परेका छन् ।

चैत २० गते गण्डकी, लुम्बिनी र सुदूरपश्चिम प्रदेशबाट प्रहरीले २४ जनालाई पक्राउ गरेको भने शनिबार मात्र काठमाडौँ उपत्यकाबाट ६२ जनालाई पक्राउ गरेको छ । चार दिनमा प्रहरीले २२६ जनालाई नियन्त्रणमा लिएको हो ।