मलाई प्रतिशोधपूर्ण ढंगले पक्राउ गरियो, कानुनी लडाइँ लड्छु: रमेश लेखक

काठमाडौ । पूर्वगृहमन्त्री रमेश लेखकले आफूलाई प्रतिशोध र पूर्वाग्रहपूर्ण ढंगले पक्राउ गरिएको बताएका छन्।

प्रहरीले उनलाई शनिबार बिहान भक्तपुरको कटुन्जेस्थित निवासबाटै पक्राउ गरेको थियो।

पक्राउपछि काठमाडौँ परिसरमा लेखकले नेपालखबरसँग भने, ‘मलाई प्रतिशोध र पूर्वाग्रह पूर्णरुपमा पक्राउ गरिएको छ। क्याबिनेट र गृहमन्त्रालयले निर्णय गरेर पक्राउ गरेको छ। यस्तो संसारमा कहीँ हुँदैन।’ 

मन्त्रिपरिषदको निर्णयबाट मान्छे पक्राउ गर्ने अभ्यास थालेर कानुनको मजाक उडाइएको लेखकले बताए।

उनले आफ्नो पक्राउविरुद्ध राजनीतिक र कानुनी लडाइँ लड्ने पनि बताएका छन्। ‘यो पक्राउविरुद्ध राजनीतिक र कानुनी लडाइँ लड्न म तयार छु,’ लेखकले भने।