बाटो र पानीको माग पुरा नभएपछि दार्चुलाका दुई स्थलमा भोट हाल्न आएनन् मतदाता

काठमाडौँ । अपी हिमाल गाउँपालिका–३ दुधीला र नौगाड गाउँपालिका– १ नागुस्थित गौरीशंकर मावि मतदानस्थलमा मतदाता भोट हाल्न नपुगेका हुन्। 

गौरीशंकरका बासिन्दाहरू बाटो र खानेपानी लगायतका मागहरू लामो समयदेखि राखिराखेका थिए। ती मागहरू पुरा नभएपछि मतदान बहिष्कार गर्ने घोषणा गरेकोले मतदान गर्न नआएको सहायक प्रमुख जिल्ला अधिकारी विनोद दाहालले जानकारी दिए। “खाद्यान्न ढुवानी लगायतका काम गर्दा विकट भएकै कारण खच्चडहरू समेत खस्ने अवस्था भएपछि तत्काल गर्न सकिने अवस्था रहेन” प्रशासनलाई उनले भने।

दुधीलाका स्थानीय बासिन्दाहरू वडा कार्यालय टाढा भएकोले वडा विभाजन गर्नुपर्छ भन्ने माग राखिरहेका थिए। तर उनीहरूको माग पनि सम्बोधन हुन नसकेका कारण मतदान गर्न अस्वीकार गरेको उनले बताए। “स्थानीयका यी आधारभूत आवश्यकताकै कारण मतदान गर्न नआएकोले शून्य मतदान भएको हो” उनले भने।

दुधिला मतदानस्थलमा तीन सय ३६ र नागुमा ६ सय २ मतदाता रहेका छन्। दार्चुलाका अन्य मतदान स्थलमा भने मतदान जारी छ।