संघ र प्रदेश सरकारका मन्त्रालय संख्या सीमित गर्ने काँग्रेसको प्रस्ताव

काठमाडौँ । नेपाली काँग्रेसले संघीय तथा प्रदेश सरकारको संरचना सानो र व्यवस्थापनयोग्य बनाउने उद्देश्यसहित मन्त्रालयको संख्या सीमित गर्ने प्रस्ताव अघि सारेको छ।

पार्टीले सार्वजनिक गरेको चुनावी प्रतिबद्धतामा संघीय तहमा अधिकतम १६ र प्रदेश तहमा ६ मन्त्रालय कायम गर्ने अवधारणा समेटिएको हो।

चुनावी कार्यक्रम सार्वजनिक गर्ने क्रममा पार्टीका सभापति गगनकुमार थापाले कार्यपालिका संरचनामा अनावश्यक विस्तार रोक्ने लक्ष्यसहित यस्तो प्रस्ताव गरिएको जानकारी दिएका हुन्। उनका अनुसार सत्ता समीकरण मिलाउन मन्त्रालय थप्ने अभ्यासलाई अन्त्य गर्न कानुनी व्यवस्था गरिनेछ।

त्यस्तै, कार्यकारी पदमा दोहोरिने अवसर पनि सीमित गर्ने योजना पार्टीले अघि सारेको छ। प्रस्तावअनुसार एउटै व्यक्ति प्रधानमन्त्री वा मुख्यमन्त्री पदमा दुई कार्यकालभन्दा बढी रहने व्यवस्था नरहने गरी नीतिगत प्रबन्ध गर्ने लक्ष्य राखिएको छ।

काँग्रेसले सरकारको आकार सानो बनाउँदा प्रशासनिक खर्च नियन्त्रण, कार्यक्षमता अभिवृद्धि तथा जिम्मेवारी स्पष्टता बढ्ने अपेक्षा व्यक्त गरेको छ।