नवीन सोच र दीर्घकालीन दृष्टिकोणसहितको शक्ति नेकपा : ‘प्रचण्ड’

काठमाडौँ । नेपाल कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ले आफ्नो पार्टीलाई समकालीन राजनीतिक परिदृश्यमा नवीन विचार र स्पष्ट दीर्घदृष्टि बोकेको शक्तिका रूपमा प्रस्तुत गरेका छन्।

पोखरामा आयोजित कार्यकर्ता भेटघाट कार्यक्रमलाई सम्बोधन गर्दै उनले वर्तमान आवश्यकता र जनअपेक्षालाई ध्यानमा राखेर पार्टीले आफ्नो प्रतिबद्धता सार्वजनिक गरेको उल्लेख गरे। उनका अनुसार परिवर्तित राजनीतिक तथा सामाजिक सन्दर्भलाई समेट्ने गरी घोषणापत्र तयार पारिएको छ।

संयोजक दाहालले केही अन्तर्राष्ट्रिय शक्ति केन्द्रहरूद्वारा भ्रष्टाचारविरुद्धको अभियानलाई लिएर द्वैध सन्देश प्रवाह भइरहेको भन्दै आपत्ति जनाए। भ्रष्टाचार नियन्त्रणका सवालमा भ्रम सिर्जना गर्ने प्रयत्न भइरहेको उनको टिप्पणी थियो।

कार्यक्रममा उनले पछिल्लो समय उल्लेख्य संख्यामा युवाहरू पार्टीमा आबद्ध भइरहेको दाबी पनि गरे। युवापुस्ताको सक्रिय सहभागिताले पार्टीलाई थप ऊर्जा र दिशा प्रदान गर्ने विश्वास उनले व्यक्त गरेका छन्।