बंगलादेश भोलि आम निर्वाचन, आधाभन्दा बढी मतदान केन्द्रमा हिंसाको जोखिम

एजेन्सी । शेख हसिना सरकारको पतनपछि बंगलादेशमा पहिलोपटक आम निर्वाचन हुन लागेको छ । करिब १७ करोड जनसंख्या भएको बंगलादेशमा ४२ हजार मतदान केन्द्र स्थापना गरिएको छ । 

बंगलादेशका प्रहरी प्रमुख बहरुल आलमका अनुसार, अशान्ति, हिंसा वा मतपत्रमा हेरफेरको आशंकाका कारण २४ हजारभन्दा बढी मतदान केन्द्रहरूलाई उच्च जोखिम वा मध्यम जोखिम भएको केन्द्रका रूपमा पहिचान गरिएको छ । यो कुल मतदान केन्द्रहरूको आधाभन्दा बढी हो ।

स्थिति नियन्त्रणमा राख्न मतदान केन्द्रहरूमा एक लाख ५७ हजारभन्दा बढी प्रहरी कर्मचारीहरू खटाइने उनले बताएका छन् । सेना तथा अन्य सुरक्षा बलका करिब एक लाख जवानहरूले पनि प्रहरीलाई सहयोग गर्नेछन् । 

निर्वाचन सुरक्षामा कुल एक लाख ५७ हजारभन्दा बढी प्रहरी जनशक्ति परिचालन गरिने बताइएको छ । 
यसपटक निर्वाचनमा प्रविधिको मुख्य भूमिका रहने बताइएको छ । निर्वाचन आयोगको पहलमा ८० देखि ९० प्रतिशत मतदान केन्द्रहरूमा सीसीटीभी क्यामेरा जडान गरिएको छ । 

आलमले जोखिमयुक्त केन्द्रहरूमा प्रहरीले पहिलोपटक बडी क्यामरा लगाएर गस्ती गर्ने जानकारी दिए । साथै प्रहरी उपरीक्षकहरूले क्षमता र आवश्यकता अनुसार उपलब्ध स्थानहरूमा ड्रोनमार्फत निगरानी गर्ने महानिरीक्षक आलमले बताए ।

यसको उद्देश्य निगरानी र पारदर्शिता बढाउनु हो । बंगलादेशमा निर्वाचन प्रक्रिया ११ डिसेम्बरबाट सुरु भएको थियो । ९ फेब्रुअरीमा निर्वाचन प्रचार समाप्त भएको छ  । 
प्रहरी रेकर्डअनुसार, यो अवधिमा राजनीतिक झडपहरूमा पाँचजनाको मृत्यु भएको छ । ६०० भन्दा बढी व्यक्ति घाइते भएका छन् ।

आलमले सन् २०२४ को अशान्तिको समयमा प्रहरीबाट लुटिएका करिब १३ सय बन्दुकबारे पनि चिन्ता व्यक्त गरेका छन् ।