नेतृत्व ओली जस्तै घमण्डी बने पार्टीले अब्बल मान्छे गुमाउँछ : तोसिमा कार्की

काठमाडौ । राष्ट्रिय स्वतन्त्र पार्टी (रास्वपा) की नेतृ डा. तोसिमा कार्कीले पार्टी नेतृत्वको कार्यशैलीप्रति असन्तुष्टि व्यक्त गरेकी छन्। उनले पार्टीलाई ‘सबै अट्ने, सबै खट्ने’ बनाउने प्रयासलाई संस्थापन पक्षले रोक्न खोजेको आरोप लगाउँदै समयमै नसुध्रिए पार्टीले धेरै अब्बल व्यक्तिहरू गुमाउने चेतावनी दिएकी छन्।

सामाजिक सञ्जालमार्फत आफ्नो धारणा सार्वजनिक गर्दै डा. कार्कीले पार्टीभित्र फरक विचार राख्नेहरूमाथि ‘मिडिया ट्रायल’ गर्ने र आत्मसम्मानमा प्रहार गर्ने प्रवृत्ति बढेको बताएकी छन्। उनले लेखेकी छन्, “‘सबै अट्ने सबै खट्ने’ पार्टी बनाउने मार्गचित्र पेस हुनै नदिन अनेक प्रयास गरियो, तर संगठनका साथीहरूको अत्याधिक दबाबका कारण संस्थापन पक्ष बाध्य बन्यो।” उनले यो अभियानमा साथ दिने पार्टीका कार्यकर्ताहरूलाई विशेष धन्यवाद दिएकी छन्।

डा. कार्कीले पार्टीका निर्णयहरू बहुमतको कदर र विधि-पद्धतिमा आधारित नभएको भन्दै नेतृत्वको कार्यशैलीको कडा आलोचना गरेकी छन्। उनले नेकपा (एमाले) का अध्यक्ष केपी शर्मा ओलीतर्फ संकेत गर्दै भनेकी छन्, “घमण्ड र दबाबले पार्टी चलाउनुथ्यो त ओली नै थिए नि! आफू र आफ्नो पार्टी सुधार्न उदार हुन नसक्ने, रिफर्मको एजेन्डालाई प्रतिगमनकारी भन्नेले देश के बनाउलान् र खोई?”

उनले पार्टी नेतृत्व समयमै नसुध्रिएमा अझै धेरै सक्षम व्यक्तिहरूले पार्टी छाड्ने चेतावनी दिएकी छन्। “हेक्का रहोस्, बेलैमा नसुध्रिए र पार्टी रिफर्म हुन नसके अझ धेरै अब्बल व्यक्तिहरू पार्टीले गुमाउँदैछ,” उनले लेखेकी छन्।
फरक विचार राख्नेहरूमाथि बारम्बार आक्रमण हुने गरेको र उनीहरूको अस्तित्वलाई एक व्यक्तिको दयामा टिकेको जस्तो देखाएर आत्मसम्मानमा प्रहार गरिने हो भने साथीहरू एकपछि अर्को गर्दै बाहिरिने उनको भनाइ छ।