मन्त्री फेर्न जसपा र लोसपाले दिएको अल्टिमेटम टेरेनन् प्रधानमन्त्री ओली

काठमाडौं । अशोक राई नेतृत्वको जनता समाजवादी पार्टी (जसपा) र महन्थ ठाकुर नेतृत्वको लोकतान्त्रिक समाजवादी पार्टी (लोसपा)ले आफनो पार्टीका मन्त्री फेर्न गरेको प्रस्ताव प्रधानमन्त्रीले थन्काईदिएका छन् । राई र ठाकुर दुवैले प्रधानमन्त्रीलाई लिखित पत्र नै बुझाएर आफनो पार्टीका तर्फबाट मन्त्री बनेकाहरु फेरिदिन आग्रह गरेका थिए ।

अझ अशोक राई नेतृत्वको जसपाले त प्रधानमन्त्रीलाइृ ११ भदौंभित्रै आफनो तर्फका मन्त्रीहरु फेरिदिन अल्टिमेटम नै दिएको थियो । तर, प्रधानमन्त्रीले दुवै पार्टीका प्रस्ताव र अल्टिमेटम दुवैलाई अहिले त्यक्तिकै थन्काईदिएका छन् ।

जसपामा मन्त्री फेर्ने प्रस्तावमा विवाद छ । मन्त्री रहेकाहरु सरकारमा टिकिरहने लविङमा छन् भने मन्त्री बन्ने लाइनमा रहेकाहरु छिटो मन्त्री फेर्न  पार्टीलाई दवाव दिईरहेका छन् । त्यस्तै लोसपामा पनि अध्यक्ष ठाकुरसँग मन्त्री बन्न नपाएको झोकमा सर्वेन्द्रनाथ शुक्लले असन्तुष्टि पोख्न थालेका छन् ।

‘हामीले पार्टीबाट निर्णय गरेरै मन्त्री फेर्न लिखित पत्र नै प्रधानमन्त्रीलाई बुझाईसकेका छौं, अझ यति दिनभित्र फेरिदिनु भनेर अल्टिमेटम नै पनि दिएका छौं,’राई नेतृत्वको जसपाका एक नेताले सफलखबरसँग भने, ‘तर प्रधानमन्त्रीले पार्टीको अल्टीमेटमलाई त्यक्तिकै थन्काइृदिएका छन् । यसले पार्टीभित्र झन् विवाद बढाउन थालेको छ ।’

‘हामीले पार्टीबाट निर्णय गरेरै मन्त्री फेर्न लिखित पत्र नै प्रधानमन्त्रीलाई बुझाईसकेका छौं, अझ यति दिनभित्र फेरिदिनु भनेर अल्टिमेटम नै पनि दिएका छौं,’राई नेतृत्वको जसपकाका एक नेताले सफलखबरसँग भने, ‘तर प्रधानमन्त्रीले पार्टीको अल्टीमेटमलाई त्यक्तिकै थन्काइृदिएका छन् । यसले पार्टीभित्र झन् विवाद बढाउन थालेको छ ।’

जसपाले खानेपानी मन्त्री प्रदीप यादवको ठाउँमा वीरेन्द्र महतो र महिला बालबालिका तथा ज्येष्ठ नागरिकमन्त्री नवलकिशोर साह सुडीको ठाउँमा रञ्जु ठाकुरलाई मन्त्री बनाउन प्रधानमन्त्री ओलीलाई चिठी पठाएको लामै समय वितिसकेको छ ।

जसपा अध्यक्ष अशोक राईले साउनमै प्रधानमन्त्रीलाई चिठी पठाएका थिए । त्यसपछि पनि निर्णय कार्यान्वयन प्रधानमन्त्रीले नगरेपछि फेरि भदौं ११ सम्म फेरिदिन अल्टिमेटम नै दिइएको थियो । तर त्यो पनि कार्यान्वयन प्रधानमन्त्रीले गरेका छैनन । ‘साउनमै मन्त्री फेर्न आग्रह गर्दै पार्टीले प्रधानमन्त्रीलाई चिठी पठाइएको हो ।

त्यसवेला प्रधानमन्त्रीको पार्टी एमाले र कांग्रेसवाट पनि मन्त्री फेर्ने भन्दै प्रधानमन्त्रीले केही समय पर्खन भन्नुभयो। हामीले पर्खियौं, ’ जसपाका ती नेताले भने, ‘तर कांग्रेस र एमालेबाट मन्त्री फेर्ने प्रस्ताव अगाडी नजाने देखेपछि हाम्रो तर्फको फेरिदिनुस भनेर ११ भदौंसम्म प्रधानमन्त्रीलाई अल्टीमेटम जस्तै दियौं, त्यो पनि कार्यान्वयन भएन । पार्टीको सिफारिस जति सक्दो चाँडो कार्यान्वयन हुने हाम्रो विश्वास छ ।’

उता लोसपाका नेताहरुले पनि प्रधानमन्त्रीले मन्त्री फेर्न गरेको आग्रह नसुनेको आरोप लगाएको छ । लोसपाका अध्यक्ष ठाकुरले साउन पहिलो साता प्रधानमन्त्री ओलीलाई भेटेरै पार्टीका मन्त्री फेर्ने निर्णय पार्टीको रहेको र मन्त्री फेर्न भन्दै चिठी बुझाएका थिए । पत्रमा श्रम, रोजगार तथा सामाजिक सुरक्षा मन्त्री शरदसिंह भण्डारीलाई फिर्ता बोलाई उनका ठाउँमा सर्वेन्द्रनाथ शुक्लाई मन्त्री नियुक्त गर्न आग्रह गरिएको थियो । चिठीमा पार्टी अध्यक्ष ठाकुरको हस्ताक्षर थियो ।

‘मन्त्री फेर्न पार्टीले प्रधानमन्त्रीलाई सिफारिस गरेको डेढ महिना हुन लागिसक्यो । प्रधानमन्त्रीले मन्त्रीमण्डल पुनर्गठन गर्दा श्रममन्त्री पनि फेर्छौं भन्नुभएको छ,’ लोसपाका महासचिव मनीष मिश्रले भने, ‘प्रधानन्त्रीले पार्टीले गरेको सिफारिसलाई चाँडोभन्दा चाँडो कार्यान्वयन गर्नुहुनेछ भन्ने हाम्रो विश्वास छ ।’

लोसपा स्रोतका अनुसार २०७९ सालमा भएको प्रतिनिधिसभा सदस्य चुनावपछि पहिलो कार्यकाल भण्डारी र दोस्रो कार्याकाल शुक्ल सरकारमा जाने सहमति भएको थियो । तर भण्डारी दुईपटक मन्त्री भइसके । माओवादी केन्द्रका अध्यक्ष पुष्पकमल दाहाल (प्रचण्ड) नेतृत्वको सरकारमा पनि भण्डारी नै मन्त्री थिए । दुई पटक लगातार दोहो¥याएर भण्डारीलाई मन्त्रीमा सिफारिस गरेपछि शुक्ल ठाकुरसँग रुष्ट थिए । यसै विषयलाई लिएर उनले पार्टी नै फुटाउन खोजेका थिए ।

ठाकुरले सम्झाइबुझाइ गरेपछि पार्टी फुटाउने कामबाट शुक्ल पछि हटेका थिए । ‘शुक्ललाई जति सक्दो चाँडो मन्त्री गराउने बाध्यता ठाकुरलाई छ । त्यसैले प्रधानमन्त्रीलाई लेखेको चिठी कार्यान्वयन हुन नसक्दा ठाकुर चिन्तित भएका छन्,’ लोसपाका एक नेताले भने।

प्रतिनिधिसभामा लोसपाका चार सांसद छन ।प्रधानमन्त्रीले कांग्रेसबाट परराष्टमन्त्री डा. आरजु राणा देउवा र गृहमन्त्री रमेश लेखक बाहेक अन्य मन्त्री फेर्न चाहेका थिए ।

त्यस्तै एमालेमा पनि उपप्रधान तथा अर्थमन्त्री विष्णु पौडेल र सञ्चारमन्त्री पृथ्वीसुब्बा गुरुङ, थोरै समय अगाडी मात्रै मन्त्री बनेका शिक्षामन्त्री रघुजी पन्त र सामान्य प्रशासन मन्त्री भगवती न्यौपाने बाहेकका अन्य मन्त्री फेर्न चाहेका थिए । तर काग्रेस तत्काल मन्त्री फेर्न तयार नभएपछि प्रधानमन्त्री आफनो तर्फका मन्त्री फेर्ने बारेमा पनि निर्णयमा पुग्न सकिरहेका छैनन ।

लोसपा र जसपाका गरी ३ मन्त्री फेर्न सम्वन्धित पार्टीले पत्राचार नै गरिसक्दा पनि प्रधानमन्त्री ओली उनीहरुको माग पनि सम्वोधन गर्न सक्ने अवस्थामा छैनन । ओली भोलि शनिबार चीन भ्रमणमा जाँदैछन् ।

चीनबाट फर्केलगत्तै एमालेको विधान महाधिवेशनमा ब्यस्त हुदैछन् । त्यसलगत्तै फेरि ओली भारतको औपचारिक भ्रमणमा जादैछन् । त्यसकारण पनि ओलीको भारत भ्रमण अगाडीसम्म अब जसपा र लोसपाको माग बमोजिम पनि मन्त्री फेर्ने योजनामा ओली देखिन्नन् ।

ओलीले पत्र पाएर पनि निर्णय कार्यान्वयन नगरेका कारण लोसपा र जसपाभित्र भने असन्तुष्टि बढ्न थालेको छ । यसले दुवै पार्टीमा समस्या निम्ताउन थालेको छ । तर प्रधानमन्त्रीले दुई पार्टीले दिएको अल्टीमेटम पनि कार्यान्वयन नगरी त्यक्तिकै थन्काईदिँदा दुवै पार्टी नेताहरु प्रधानमन्त्रीले नै आफनो पार्टीभित्र खेल्न थालेको आरोप लगाउन थालेका छन् ।