भारतीय लागूऔषध कारोबारीमाथि गोली प्रहार, खैरो हेरोइन बरामद

काठमाडौं । बाँकेको नेपालगञ्ज उपमहानगरपालिका ४ मा लागुऔषध खैरो हेरोइन कारोबारमा संलग्न चार जनालाई प्रहरीले गोली हानेर नियन्त्रण लिएको छ ।

नेपागञ्ज उपमहानगरपालिका ५ का २६ वर्षीय भाइजन अन्सारी सोही ठाउँ बस्ने २२ वर्षीय अमन साह, भारतको बहराइज रुपैडिया थानाका २० वर्षीय अजयकुमार र २० वर्षीय कार्त्तिककुमारलाई लागुऔषध नियन्त्रण ब्युरो शाखा कार्यालय नेपालगञ्जको टोलीले नियन्त्रणमा लिएको छ ।

नेपालगञ्ज उपमहानगरपालिका ४ मा प्रहरीले शंका लागेर खानतलासी गर्ने क्रममा प्रहरीमाथि नै इँटा प्रहार गरेपछि प्रहरीले गोली हानेर उनीहरूलाई नियन्त्रणमा लिएको हो । प्रहरीले चलाएको गोली लागेर कार्त्तिककुमार घाइते भएका छन् । बाँके प्रहरी प्रमुख एसपी रामप्रसाद घर्तीका अनुसार इँटा लागेर एकजना प्रहरी घाइते भएका छन् ।

उनको दायाँ खुट्टाम गोली लागेको छ । उनलाई उपचारका लागि अस्पताल पठाइएको प्रहरीले जनाएको छ । उनीहरूबाट प्रहरीले २६५ ग्राम खैरो हेरोइन बरामद गरेको छ ।