माओवादी पार्टी स्कुल उपप्रमुखको जिम्मेवारी गंगानारायण श्रेष्ठले पाए

काठमाडौँ । नेपाल समाजवादी पार्टी(नेसपा)बाट एकतामा जोडिएका गंगानारायण श्रेष्ठले नेकपा(माओवादी केन्द्र)को पार्टी स्कुल विभाग उपप्रमुखको जिम्मेवारी पाएका छन् । सोमबार सम्पन्न माओवादी स्थायी समिति बैठकले श्रेष्ठलाई जिम्मेवारी दिएको उपमहासचिव मातृका यादवले जानकारी दिए । 

२०८१ माघ २१ गते बसेको पदाधिकारी बैठकले स्कुल विभाग प्रमुखको जिम्मेवारी अध्यक्ष पुष्पकमल दाहाल प्रचण्ड र सहइन्चार्ज उपमहासचिव गिरिराजमणि पोखरेललाई दिएको थियो । यस्तै नेपाः राष्ट्रिय पार्टीबाट आएका डा. विजय सैंजुले बागमती प्रदेश समन्वय कार्यालय सदस्यको जिम्मेवारी पाएका छन् । 

बागमती प्रदेशको इन्चार्जमा सचिव हितमान शाक्य रहेका छन् । श्रेष्ठ र सैंजुको पार्टीले जेठ १२ गते माओवादीसँग एकता गरेको थियो । त्यतिबेला श्रेष्ठलाई सचिव र सैंजुलाई स्थायी समिति सदस्य बनाएको थियो । एकतामा जोडिएका अन्य नेताहरूको जिम्मेवारी आवश्यक छलफल गरी जिम्मेवारी दिएको र पुराना नेताहरूको हकमा यथावत् रहेको यादवले बताए । 

‘पार्टीले एकताबाट आएका गंगानारायणजी र विजयजीलाई मात्र जिम्मेवारी दिएको हो । पुराना नेताहरूको जिम्मेवारी यथावत् राखिएको छ । एकतामा आएका अन्य नेताहरूको विषयमा अहिले कुनै निर्णय भएको छ । छलफल गरेर पछि जिम्मेवारी दिन्छ’, उनले भने ।