श्रीमतीको हत्या गरेको अभियोगमा एक युवक पक्राउ

पाँचथर । पाँचथरमा श्रीमतीको हत्या गरेको अभियोगमा एक  युवक पक्राउ परेका छन् ।  २२ वर्षीया अनु राईको हत्या गरेको अभियोगमा फालेलुङ गाउँपालिका–७ आहाले बस्ने २७ वर्षीय महेन्द्र तामाङलाई शुक्रबार बिहान प्रहरीले पक्राउ गरेको हो ।

फिदिम नगरपालिका–१ नाम्दुस्थित ससुराली घरमा बिहीबार राति महेन्द्रले कोदालोको पासो प्रहार गर्दा अनु गम्भीर घाइते भएकी थिइन् ।  त्यसलगत्तै जिल्ला प्रहरी कार्यालय पाँचथरबाट खटिएको प्रहरीले उनलाई उपचारको लागि जिल्ला अस्पताल पाँचथर पठाएको थियो ।

उनको बीएण्डसी अस्पताल बिर्तामोडमा थप उपचारको क्रममा  मृत्यु भएको थियो । साथै सोही कार्यालयबाट खटिएको प्रहरीले महेन्द्रलाई फिदिम नगरपालिका–६ गोले गाउँबाट पक्राउ गरेको हो । घटनाका सम्बन्धमा प्रहरीले आवश्यक अनुसन्धान भइरहेको जनाएको छ ।