कांग्रेसका यी ७ नेताले सभापति देउवा भेटदै, शेखरका बारेमा सोध्ने

काठमाडौं । नेपाली कांग्रेसमा संस्थापन पक्षका ७ प्रभावशाली  नेताले सभापति शेरबहादुर देउवा  संग आज भेट्घाट गर्दैछन् । कांग्रेस संस्थापन इतरका नेता शेखर कोइरालाले पार्टीभित्र बढाएको दवाव, विपक्षी माओवादी केन्द्रका अध्यक्ष प्रचण्ड देखि पूर्वराष्टपति विद्यादेवी भण्डारीसम्मलाई गरेको भेटघाट र कांग्रेस- एमाले गठबन्धन सरकारका विरुद्ध आफु निकट नेता र सांसदहरुसँग छलफल थालेपछि कांग्रेसका संस्थापन पक्षका प्रभावशाली नेताहरुको छलफल भएको थियो ।

हुन त यी नेताहरु कांग्रेसको अबको महाधिवेशनमा देउवाले कसलाइ नेतृत्वका लागि अगाडी सार्छन् भन्ने विषयमा पनि देउवाले जवाफ दिनुपर्ने पक्षमा छन् । त्यसका लागि उनीहरुले देउवालाई भेटेर यस अगाडी नै प्रश्न पनि गरेका थिए

 कहिले कुन नेता त कहिले कुन नेताको घरमा आन्तरिक छलफलमा विगत केही समय देखि जुट्दै आएका कांग्रेसका संस्थापनका यी नेताहरुले सातै प्रदेशमा प्रदेश स्तरीय सभा आयोजना गर्ने निर्णय पनि यस अगाडी गरेका थिए । तर वर्षाको समय भएकोले भदौंबाट मात्र अब यो अभियान चलाउने उनीहरुको मत छ ।

यसरी भेटघाटमा जुटेका संस्थापनपक्षका नेताहरु हुन् - पूर्वउपसभापति गोपालमान श्रेष्ठ, विमलेन्द्र निधि, विजयकुमार गच्छदार, प्रकाशमान सिंह, पूर्वमहामन्त्रीहरू शशांक कोइराला, कृष्णप्रसाद सिटौला र प्रवक्ता प्रकाशशरण महत । उनीहरुबीच सोमबार प्रकाशमान सिंहको ठमेल चाक्सीबारीस्थित निवासमा जमघट भएको थियो । उनीहरू सबै सभापति देउवानिकट नेताहरू हुन्।

सोमबारको छलफल विशेषगरी पार्टीकै संस्थापनइतरका नेता शेखर कोइरालाको पछिल्ला भेटघाट र गतिविधिमा केन्द्रीत रहेको बैठकमा सहभागी एक नेताले बताए । 'शेखरका पछिल्ला भेटघाट र गतिविधि पार्टी हितका पक्षमा छैनन, उनले पार्टीभित्र थप गुटवन्दी बढाउने र अन्तत पार्टी नै विभाजनको दिशामा लैजाने खेलका सथ काम भईरहेका छन्, यसलाई पार्टीले छुट दिनु हुन्न, यसबारेमा सभापतिलाई बेलैमा ध्यानाकर्षण गराउनुपर्छ', कांग्रेसका यी नेताहरुले छलफल गरेका थिए ।

शेखरका गतिविधिका बारेमा कोइराला परिवारकै नेता शसांक कोइरालाले प्रश्न उठाएका थिए । शेखर कोइरालाले भने अब पार्टीभित्र अन्तरसंर्घष चर्काउने, कांग्रेस एमाले गठबन्धन सरकारको खुलेर विरोध गर्ने नीति अख्तियार गर्न लागेका छन् । त्यसका लागि आवश्यक परे र संख्या जुटे संसदीय दलको नेता फेर्ने र विपक्षीहरुले साथ दिए आफ्नै नेतृत्वमा नयाँ समिकरणको कोसिस पनि गर्ने तयारी थालेका छन् ।

शेखरले पार्टीभित्र अब असन्तुष्टि र जनआक्रोशका आवाज खुलेरै सार्वजनिक गर्ने नीति पनि अवलम्बन गर्न लागेका छन् । पूर्वरास्ट्रपति विद्या भण्डारी सक्रिय राजनीतिमा आउने कुरालाई रोक लगाउनु पर्ने कांग्रेसका अधिकाशं नेता कार्यकर्ताको मत रहेका बेला शेखरले भण्डारीसँग भेट गरेर राजनीतिमा आउन सहयोग र स्वागत नै गर्ने वचन दिएर फर्केको बुझाईमा यी देउवा निकटका नेताहरु छन् ।

विद्या भण्डारी राजनीतिमा सक्रिय हुँदा कुनै न कुनै बहानामा कम्युनिष्टहरु एक हुनसक्ने, कांग्रेसको प्रजातानित्रक मत राष्टिय स्वतन्त्र पार्टी (रास्वपा)ले धेरै काट्ने र कांग्रेस चुनावमा निरिह बन्न सक्ने उनीहरुको बुझाई छ । जसकाकारण पनि भण्डारीलाई राजनीतिमा आउनबाट रोकेर कम्युनिष्टहरुलाई चुनावमा एक ठाउ आउन दिन नहुने, रास्वपातिर जान खोजेको कांग्रेसको जनमत कांग्रेसभित्रै सुरक्षित राख्नुपर्ने र शेखरका विपक्षी पार्टी र नेताहरुसँग बढ्न थालेको हिमचिम बेलैमा रोक्नुपर्नेमा कांग्रेसका यी सात भाई एक ठाँउ छन् ।

सोही कारण पनि उनीहरुले आज बिहान १० बजे सभापति शेरबहादुर देउवालाई भेटेर गुनासो राख्ने तयारी गरेका छन् । चाक्सीबारी छलफलपछि पूर्वउपसभापति गोपालमान श्रेष्ठले समग्र विषयमा सभापति शेरबहादुर देउवालाई भेटेर कुरा राख्न लागिएको जानकारी दिए ।

‘मंगलबार बिहान १० बजेतिर हामी सभापतिजीलाई भेटेर कुरा राख्छौं,’ उनले भने । यो समुहले सरकारमा केपी ओलीले प्रभावकारी काम देखाउन नसकेको विषयमा पनि छलफल गरेका थिए । कांग्रेसबाट सरकारमा नेतृत्व गरेर गएका प्रकाशमान सिंह स्वयम यो बैठकमा सहभागी भएको र उनकै निवास चाक्सीबारीमा छलफल भएकोले उनीहरुले सिंहलाई सरकारमा कांग्रेसका तर्फबाट प्रभावकारी भूमिका खेल्न र कांग्रेसमा उठ्न खोजेको असन्तुष्टि सम्वोधन गरेर अगाडी बढ्न प्रधानमन्त्री ओलीलाई प्रकाशमान सिंहले नै कुरा गर्ने समझदारी पनि यी नेताहरुको बीचमा बनेको छ ।

त्यसो हुँदा कांग्रेसका देउवा निकटका ७ भाईले पार्टीको आगामी महाधिवेशन, शेखरले चालिरहेको कदम, सरकारका काम बारवाही लगायतका विषयमा आज सभापति देउवासँग छलफल गर्नेछन् । उनीहरुले कांग्रेस र एमाले गठबन्धन अहिले टिकाएर जानुपर्ने पक्षमा पनि देउवालाई भन्नेछन् । शेखरले गठबन्धन भत्काउन गरिरहेको गृहकार्यलाइ तोडेर अहिले यही गठबन्धन टिकाउनु पर्ने र सभापतिले सरकारको नेतृत्व गर्ने पालो कुरेरै बस्नुपर्ने निश्कर्षमा कांग्रेसका यी ७ भाई नेता रहेको बैठकमा सहभागी एक नेताको भनाइ छ ।