विदेशबाट मिनिरल वाटर मगाउने प्रवृतिप्रति प्रभु साहले उठाए प्रश्न

काठमाडौँ । आम जनता पार्टी (आजपा) का अध्यक्ष एवं पूर्वमन्त्री प्रभु साहले विदेशबाट मिनिरल वाटर मगाउने प्रवृति उचित नरहेको बताएका छन् । बुधबार सिंहदरवार स्थित आजपाको संसदीय दलको कार्यालयमा सञ्चारकर्मीसँगको भेटमा उनले यस्तो बताएका हुन् । शासन सत्तामा रहनेले आफू विदेशबाट मिनिरल वाटर मगाएर पिउने जनतालाई खानेपानी समेत उपलब्ध गराउन नसक्ने अवस्था अन्त्य हुन आवश्यक रहेको बताए ।

‘प्रकृतिले हामी सबैलाई हावापानी बराबर दिएको छ । त्यसमा सबैको बराबर हक लाग्छ । तर आफै विदेशबाट मिनिरल वाटर मगाएर पिउने प्रधानमन्त्रीजीले नेपाली जनतालाई खानेपानी रोकेर मानवता विरोधी अपराध गर्दैहुनुहुन्छ,’ साहले भने ।

शासन सत्तामा रहनेले आफू जनताले तिरेको करबाट विदेशी पानी पिउने तर, तर सर्वसाधारणलाई नर्मल पानी पनि नदिएर के गर्न खोजिएको हो भन्ने उनको प्रश्न छ । उनका अनुसार अहिले तराई मधेसमा पानीको हाहाकार छ । इनार सुकेको छ, चापाकलबाट पानी आउन छोडेको छ । काठमाडौँको सुकुम्वासी बस्तीमा समेत सरकारले खानेपानी दिन नसक्दा सुकुम्वासी तथा अव्यवस्थित बसोबासहरू आन्दोलित छन् ।

सुकुम्वासी संघले खानेपानीको माग गर्दै काठमाडौँको त्रिपुरेश्वर स्थित काठमाडौँ उपत्यका खानेपानी लिमिटेड (केयूकेएल) को कार्यालय अगाडी धर्ना दिँदै आएका छन् । सुकुम्वासी बस्तीमा खानेपानीको व्यवस्था गर्नुपर्ने उनीहरूको जायज माग समेत सम्बोधन गर्न साहको आग्रह छ ।