उपनिर्वाचन उम्मेदवार चयनबारे छलफल गर्दै राप्रपा

काठमाडौँ । राष्ट्रिय प्रजातन्त्र पार्टी (राप्रपा)ले बिहीबार केन्द्रीय कार्यसम्पादन समितिको बैठक बोलाइएको छ ।  बिहान ११ बजे बस्नेगरी बैठक तय भएको पार्टीका प्रवक्ता ज्ञानेन्द्र शाहीले जानकारी दिए । बैठकमा आगामी कात्तिक १७ गते तय भएको उपनिर्वाचनका लागि रुपन्देही–३ को उम्मेदवारबारे छलफल हुने शाहीको भनाइ छ । 

शाहीले उपनिर्वाचनमा पार्टीको तर्फबाट उम्मेदवार नेताको खल्तीबाट नभई जनताको मनबाट छानिनु पर्ने बताए ।  बुधबार पनि रुपन्देहीका राप्रपा नेताहरूले पार्टी अध्यक्ष राजेन्द्र लिङ्देनको निवासमा उम्मेदवारबारे छलफल गरेका थिए  । 

‘चुनावमा उम्मेदवार जनताको मनबाट छानिनु पर्छ । कुनै नेताको खल्ती बाट होइन,’ शाहीले भने, ‘नेताको खल्तीको उम्मेदवारलाई  जनताले पत्याउने दिन गए।’ यसअघि रुपहेन्दी क्षेत्र नम्बर ३  बाट राप्रपाका नेता दीपक बोहराले जितेका थिए । तर, उनको निधन भएपछि  रिक्त रहेको स्थानमा उपनिर्वाचन हुन लागेको हो।