दुई दिनमा एअर इण्डियाकाे तेस्राे विमानमा पनि प्राविधिक समस्या

एजेन्सी । अमेरिकाकाे सान फ्रान्सिस्कोबाट मुम्बई गइरहेकाे एयर इन्डियाको उडानमा आज  प्राविधिक समस्या देखिएकाे छ  ।

कोलकाता विमानस्थलमा अवतरण भई मुम्बई गइरहेको विमानमा मंगलबार बिहान  समस्या देखिएपछि एअर इन्डियाले यात्रुहरू ओरालेको छ ।

उडान नम्बर AI180 कोलकाता हुँदै मुम्बई जाँदै थियो। बोइङ ७७७-२००LR (वर्ल्डलाइनर) विमान मङ्गलबार बिहान १ बजे कोलकाता आइपुगेकाे थियाे । बिहान २:०० बजे मुम्बईका लागि उडान भर्नु पर्ने थियो। विमानको बायाँ इन्जिनमा प्राविधिक गडबडीका कारण टेकअफ ढिलो भयो। त्यसपछि बिहान ६ बजेतिर क्याप्टेनले यात्रुहरूलाई विमानबाट ओर्लन भने। उनले उडान सुरक्षालाई ध्यानमा राखेर यो निर्णय गरिएको बताए । 

यसअघि सोमबार हङकङबाट दिल्ली आउने एउटा उडान र दिल्लीबाट राँची जाने एयर इन्डियाका दुई उडानहरूमा समेत समस्या देखिएकाे थियाे ।

हङकङबाट दिल्ली आउने एयर इन्डियाको उडान (नम्बर AI315)मा प्राविधिक समस्या देखिएपछि  हङकङ  फर्किनुपरेकाे थियाे । यसमा प्राविधिक गडबडी भएको रिपोर्ट गरिएको थियो। यो उडान बोइङ ७८७-८ ड्रीमलाइनरको थियो।

यस्तै साेमबारनै दिल्लीबाट राँची जाने एयर इन्डिया एक्सप्रेसको उडान शंकास्पद प्राविधिक समस्याका कारण उडान भरेको केही समयपछि नै दिल्ली फर्काइएको थियो। बोइङ ७३७ म्याक्स ८ विमान साँझ ६:२० बजे राँचीको बिरसा मुन्डा विमानस्थलमा अवतरण गर्नुपर्ने थियो।

यसरी २ दिनका बिचमा  एअर इन्डियाकाे ३ विमानमा समस्या आउनु र गत बिहीबार विमाननै दुर्घटनामा पर्नुले भारतकाे उड्यन क्षेत्रमा व्यापक निराशा  ल्याएकाे छ ।

गत बिहीबार एअर इन्डियाकाे भारतकाे अहमदाबादबाट बेलायतकाे लण्डनका लागि उडेकाे जहाज दुर्घटना हुँदा २४१ र दुर्घटनास्थलमा रहेका ३४ गरि २७५ जनाकाे मृत्यु भएकाे थियाे ।