गृहमन्त्रीको राजीनामाबाट शर्तसहित पछि हटे विपक्षी

काठमाडौं । भिजिट भिसा प्रकरणमा संलग्नताको आरोप लगाउँदै गृहमन्त्रीको राजीनामा मागिरहेका विपक्षी दलहरू आफ्नो अडानबाट पछि हटेका छन् ।

राजीनामा माग्दै १२ जेठबाट सदन अवरुद्ध गर्दै आएका विपक्षी दलले प्रतिनिधिसभाको आजको बैठक चल्न दिने भएका हुन् । यसका लागि उनीहरूले भिजिट भिसा प्रकरणमा छानबिनका लागि सरकार तयार हुनु पर्ने शर्त राखेका छन् ।

भिजिट भिसा प्रकरणमा आफ्नो संलग्नता अस्वीकार गर्दै आएका गृहमन्त्री लेखकले सदनमार्फत् धारणा व्यक्त गर्न सभामुखसँग पटकपटक समय लिए पनि विपक्षीले बोल्न दिएका थिएनन् ।

मंगलबार भने विपक्षी दलहरूले गृहमन्त्रीलाई बोल्न दिने भएका छन् । तर, त्यसका लागि सरकारले भिजिट भिसा प्रकरणको छानबिनका लागि सरकार तयार भए गृहमन्त्रीलाई बोल्न दिने विपक्षीको भनाइ छ । यो प्रकरणमा अख्तियार दुरुपयोग अनुसन्धान आयोगले छानबिन गरिरहेको छ ।

१५ जेठमा बजेट प्रस्तुत गरिसकेको भए पनि सदन अवरुद्ध हुँदा बजेटमाथिको छलफल प्रभावित हुने अवस्था छ । त्यसैले सभामुख देवराज घिमिरले सदनको अवरोध खुलाउने प्रयास स्वरूप आज बिहान प्रमुख दलहरूको संयुक्त बैठक बोलाएका थिए ।

त्यसअघि सोमबार प्रधानमन्त्री केपी शर्मा ओली, प्रमुख सत्तारुढ दल नेपाली कांग्रेसका सभापति शेरबहादुर देउवा र प्रमुख प्रतिपक्षी दल नेकपा माओवादी केन्द्रका अध्यक्ष पुष्पकमल दाहाल प्रचण्डको बैठक बसेको थियो । सो बैठकमा पनि सदनको गतिरोध खुलाउन सत्तापक्षले आग्रह गरेको थियो ।