जनप्रतिनिधिले जिम्मेवार र जवाफदेहितासहित नागरिक हक अधिकारका लागि काम गर्नुपर्छ : कृष्णप्रसाद सिटौला

दोलखा । नेपाली कांग्रेस राष्ट्रियसभाका संसदीय दलका नेता कृष्णप्रसाद सिटौलाले जनप्रतिनिधिले नागरिकका अपेक्षा अनुसार काम गर्नुपर्ने बताएका छन् । उनले जनप्रतिनिधिले जिम्मेवार र जवाफदेहितासहित नागरिक हक अधिकारका लागि काम गर्नुपर्ने बताए । 

दोलखामा प्रदेशस्तरीय राष्ट्रपति रनिङ शिल्ड प्रतियोगिताको उद्घाटन गर्दै नेता सिटौलाले जनप्रतिनिधि नागरिक प्रति जिम्मेवार बन्दै आर्थिक समृद्धिमा अघि बढ्नुपर्नेमा जोड दिए । सरकारले आफ्ना कार्यक्रम विकेन्द्रीकरण गर्नुपर्ने बताउँदै उनले सङ्घीयता पछिका विकास, नागरिकका सेवा र सहजताका विषयमा समीक्षा गर्नुपर्ने बताए । जनताका अधिकार, आर्थिक समृद्धिका लागि कानुनी र व्यवहारिकतामा सुधार गर्नुपर्नेमा उनको जोड थियो ।

नेपालले खेलकुद क्षेत्रमा राम्रो नतिजासहित राष्ट्रको गरिमा बढाएको उनको भनाई छ । खेलकुदको अनुशासन जस्तै राजनीतिमा पनि अनुशासन हुन जरुरी रहेको उनले बताए । 

कार्यक्रममा बागमती प्रदेशका आर्थिक मामिला तथा योजना मन्त्री कुन्दनराज काफ्लेले खेलकुदको बजेट दोब्बर बनाउने बताए । खेलकुद क्षेत्रलाई सरकारले प्राथमिकताका साथ अघि बढाएको उनले बताए । प्रदेश सरकारले सहर केन्द्रित खेलकुदका गतिविधि ग्रामीण क्षेत्रसम्म पुर्‍याउने काम गरेको समेत उनले बताए । नागरिकका समस्या हल गर्न र विकास निर्माणका काममा प्रदेश सरकार प्रतिबद्ध रहेको मन्त्री काफ्लेको भनाई छ । युवा खेलाडीका विषयमा सरकारले प्राथमिकताका साथ आर्थिक उपार्जनमा जोड्ने गरी काम अघि बढाएको समेत उनले बताए ।

कार्यक्रममा प्रदेशका युवा तथा खेलकुद मन्त्री मीनकृष्ण महर्जनले खेलकुदका संरचना निर्माणलाई गुणस्तर कायम गर्दै खेलकुदका गतिविधि सञ्चालनमा सरकारले जोड दिइरहेको बताए ।