लुम्बिनी प्रादेशिक अस्पतालमा नयाँ रक्तसञ्चार केन्द्र उद्घाटन

बुटवल । लुम्बिनी प्रदेशका मुख्यमन्त्री चेतनारायण आचार्यले लुम्बिनी प्रादेशिक अस्पतालमा नयाँ रक्तसञ्चार केन्द्रको उद्घाटन गरेका छन् । शनिबार आचार्यले  रुपन्देही व्यापार सङ्घको उपकरण सहयोगमा निर्मित रक्तसञ्चार केन्द्रको उद्घाटन गरेका हुन् ।

उनले बिरामीलाई नयाँ जीवन प्रदान गर्न ‘रक्तदान महादान’ भएकाले यस प्रकारको दानमा जोडिन सबैलाई आह्वान समेत गरेका छन् । मुख्यमन्त्री आचार्यले प्रदेश सरकारले सबै बिरामीलाई निःशुल्क रगत उपलब्ध गराउने कार्यक्रम अघि सारेको स्पष्ट पार्दै निजी र सामुदायिक अस्पतालमा उपचार गराइरहेका बिरामीलाई रगत उपलब्ध गराउन केही कानुनी जटिलता रहेकोले त्यसलाई फुकाउने गरी काम भइरहेको बताए ।

उनले प्रदेश सरकारले लुम्बिनी प्रादेशिक अस्पताललाई गौरवको आयोजनाका रूपमा अघि बढाएको र अस्पतालभित्रका सेवा विस्तार भइरहेको समेत बताए ।

उक्त कार्यक्रममा लुम्बिनी प्रदेशका स्वास्थ्यमन्त्री खेमबहादुर सारू, प्रदेशसभा सदस्यहरू, स्थानीय तहका जनप्रतिनिधिहरू, सरोकारवाला पक्ष, स्वास्थ्यकर्मी तथा आम सर्वसाधारणको सहभागिता रहेको थियो ।

रुपन्देही व्यापार सङ्घका अध्यक्ष दीपक अधिकारीले १ करोड ७० लाख रुपैयाँ सङ्घको सामाजिक उत्तरदायित्व अन्तर्गत उक्त उपकरण खरिद गरेर अस्पताललाई प्रदान गरिएको जानकारी दिए ।