लुम्बिनी प्रादेशिक अस्पताल न्यूनतम सेवा मापदण्डमा ९० अंकसहित नेपालमै पहिलो

काठमाडौँ । लुम्बिनी प्रादेशिक अस्पताल बुटवलले न्यूनतम सेवा मापदण्ड मूल्यांकन (एमएसएस) मा लगातार उत्कृष्ट नतिजा प्राप्त गरेको छ । 

अस्पतालले यस वर्ष पनि ‘सेकेण्डरी बी’ लेभल अस्पतालको मूल्याङ्कनमा सुधार गर्दै ९० अंकसहित लगातार तेस्रो पटक नेपालमै पहिलो हुन सफल भएको हो ।

अस्पतालले गत वर्ष ८९ अंक प्राप्त गरेर नेपाल प्रथम हुन सफल भएको थियो । अस्पतालमा आयोजित सेवा मूल्यांकन समीक्षा कार्यक्रममा उपलब्ध सेवा, उपकरण, भौतिक संरचना तथा जनशक्ति लगायतको बारेमा जानकारी गराइएको थियो । यो अस्पतालसँगै भक्तपुर अस्पतालले समेत समान ९० अंक प्राप्त गरेको छ ।

अस्पतालमा ५१ विशेषज्ञ चिकित्सकसहित ८ सय ५० बढी स्वास्थ्यकर्मी तथा कर्मचारीबाट सेवा प्रदान भइरहेको प्रशासकीय प्रमुख प्रेम गौतमले जानकारी दिए ।