बंगलादेश हुँदै आयात हुने केही समानमा भारतले लगायो विशेष प्रतिबन्ध

ढाका । भारतले शनिबार बङ्गलादेशबाट आफ्ना बन्दरगाहहरू मार्फत तयारी पोसाक र प्रशोधित खाद्य वस्तुहरू सहित केही वस्तुहरूको आयातमा विशेष प्रतिबन्ध लगाएको छ ।  वाणिज्य मन्त्रालय अन्तर्गतको विदेश व्यापार महानिर्देशनालय (डीजीएफटी)ले यस सम्बन्धमा एक सूचना जारी गरेको छ ।

डीजएिफटीले लगाएको प्रतिबन्ध तत्काल लागू भएको बताइएको छ । यी प्रतिबन्धहरू अन्तर्गत अब कुनै पनि भूमि बन्दरगाहबाट बङ्गलादेशबाट तयारी पोसाक आयात गर्न अनुमति दिइने छैन । सूचनाअनुसार अब यो न्हावा शेवा बन्दरगाह र कोलकाता बन्दरगाह मार्फत मात्र अनुमति दिइनेछ । 

डीजीएफटीका अनुसार बङ्गलादेशबाट माछा, एलपीजी, कुचिएको ढुङ्गा र खाद्य तेलको आयातमा भने बन्दरगाह प्रतिबन्ध लागू हुनेछैन । मन्त्रालयका अनुसार यी बन्दरगाह प्रतिबन्धहरू भारत हुँदै नेपाल र भुटान जाने बङ्गलादेशी सामानहरूमा पनि लागू हुने छैनन् ।