अनलाइन जुवा खेलाएको आरोपमा ११ जना भारतीय नागरिक पक्राउ

काठमाडौँ । अनलाइन जुवा (सट्टाबाजी) खेलाएको आरोपमा प्रहरीले काठमाडौँको बूढानीलकण्ठबाट ११ जना भारतीय नागरिकलाई पक्राउ गरेको छ।

भारत राजस्थान प्रदेश जयपुर घर भएका हाल बुढानिलकण्ठ नगरपालिका बस्ने २४ वर्षीय सनी मिनासमेत ११ जना भारतीय नागरिकहरूलाई मंगलबार साँझ प्रहरीले पक्राउ गरेको हो । 

उनीहरूलाई बुढानिलकण्ठ नगरपालिका-३ देउला टोलस्थित घर भाडामा लिई अनलाइन जुवा खेल्ने/खेलाउने कार्य गरिरहेको भन्ने सूचनाको आधारमा जिल्ला प्रहरी परिसर काठमाडौँबाट खटिएको प्रहरीले पक्राउ गरेको हो ।

प्रहरीले उनीहरूको साथबाट मोबाइल ३४ थान, ल्यापटप ५ थान, भारतीय बैंक खाताको चेक बुक १४ थान, भारतीय एटिएम कार्ड २७ थान र भारतीय सिम कार्ड ४० थान समेत बरामद गरेको छ । साथै उनीहरूले हाल सम्म २ अर्ब भन्दा बढी रकमको कारोबार हुने गरी अनलाइन जुवा खेल्ने/खेलाउने कार्य गरेको र ९६ लाख ३३ हजार रुपैयाँ भन्दा बढी रकम अभौतिक मुद्राको कारोबार समेत गरेको प्रारम्भिक अनुसन्धानबाट खुल्न आएको छ । 

पक्राउ परेकाहरूलाई उपर जिल्ला अदालत काठमाडौँबाट ७ दिन म्याद थप अनुमति लिई प्रहरीले आवश्यक अनुसन्धान गरिरहेको छ ।