इजरायली सेनाकाे आक्रमणबाट गाजा पट्टीमा ३४ प्यालेस्टिनी मारिए

एजेन्सी । इजरायली सेनाले गाजा पट्टीमा व्यापक आक्रमण गरिरहेको  छ। गाजाको हमासद्वारा सञ्चालित नागरिक रक्षा एजेन्सीका प्रवक्ताका अनुसार पछिल्लो आक्रमणमा कम्तीमा ३४ प्यालेस्टिनी मारिएको बीबीसीले उल्लेख गरेको छ । सो आक्रमणमा कम्तीमा ७० जनाभन्दा बढी घाइते भएका छन्।

इजरायल रक्षा बलले हमाससँग सम्बन्धित आतंकवादीलाई लक्षित गरेर आक्रमण गरिरहेको छ । जनवरी १९ मा युद्धविराम सुरु भएदेखि गाजामा हवाई आक्रमणको यो सबैभन्दा ठुलो लहर हो। 

चिकित्सक र प्रत्यक्षदर्शीहरूलाई उद्धृत गर्दै रोयटर्सको रिपोर्ट अनुसार मध्य गाजाको देइर अल–बलाहमा तीन घर, गाजा शहरको एउटा भवन र खान युनिस र रफाहलाई लक्षित गरेर आक्रमण भएका छन् ।

प्रधानमन्त्री कार्यालयको एक विज्ञप्ति अनुसार इजरायली प्रधानमन्त्री बेन्जामिन नेतान्याहू र रक्षामन्त्री इजरायल काट्जले मंगलबार बिहान आक्रमणको आदेश दिएका थिए।

हामसले  बन्धकहरूलाई रिहा गर्न बारम्बार अस्वीकार गरेको, साथै अमेरिकी राष्ट्रपतिका दूत स्टीव विटकफ र मध्यस्थकर्ताहरूबाट प्राप्त सबै प्रस्तावहरूलाई अस्वीकार गरेकोले आक्रमणलाई निरन्तरता दिइएको इजरायलको भनाइ छ ।